Қирғизистон–Ўзбекистон чегарасидаги учта пункт 24 соатлик иш режимига ўтди
Ушбу тартиб 2026 йил 1 октябргача амал қилиши белгиланган.
Қирғизистон ва Ўзбекистон чегарасидаги учта назорат-ўтказиш пункти 24 соатлик иш режимига ўтказилди. Бу ҳақда Қирғизистон Давлат чегара хизмати маълумотига таяниб «AKIpress» хабар берди.
Маълум қилинишича, Боткен вилоятида жойлашган “Қадамжой — автойўл”, “Чашма — автойўл” ҳамда “Оқ-Қия — автойўл” пунктлари 20 майдан бошлаб туну кун узлуксиз фаолият юритмоқда.
Мазкур қарор сайёҳлик мавсуми давомида чегарадан ўтувчи фуқаролар учун қулай шарт-шароитлар яратиш мақсадида қабул қилинган. Янги тартибга кўра, ушбу пунктлардан фақат Қирғизистон ва Ўзбекистон фуқаролари ўтиш имконига эга бўлади.
Шунингдек, 24 соатлик иш режими 2026 йил 1 октябргача амал қилиши белгиланган.
