“Бунёдкор” ходимларининг 867 млн сўм иш ҳақи тўлиқ ундирилди
Стадионда фаолият юритаётган 49 нафар ишчи ойлик маошларини ололмаётганини маълум қилган эди.
«Бунёдкор» стадиони ходимларининг бир неча ойдан буён тўланмай келган иш ҳақи қарздорлиги тўлиқ ундириб берилди. Бу ҳақда Давлат меҳнат инспекцияси матбуот хизмати маълум қилди.
Маълум қилинишича, инспекциянинг ёзма кўрсатмасига асосан стадионда фаолият юритаётган 49 нафар техник ходим — жумладан қоровул, сантехник, фаррош ва электрчиларнинг жами 867 миллион сўм миқдоридаги иш ҳақи қарздорлиги тўлиқ қоплаб берилиши таъминланган.
Аввалроқ мазкур ходимлар бир неча ойдан буён ойлик маошларини ололмаётгани, бу эса уларнинг моддий аҳволига жиддий таъсир кўрсатаётгани юзасидан оммавий ахборот воситаларига мурожаат қилган. Мурожаатларда айрим ходимлар кредит мажбуриятларини бажаришда қийинчиликка учрагани ва кундалик эҳтиёжларини таъминлашда муаммолар юзага келгани ҳам қайд этилган.
Стадион маъмурияти томонидан ойликларнинг кечикиши молиявий манбалардаги ўзгаришлар билан изоҳланган бўлсада, Давлат меҳнат инспекцияси аралашувидан сўнг ҳолат тўлиқ бартараф этилган.
Ҳозирда «Бунёдкор» стадиони ходимлари олдида иш ҳақи бўйича қарздорлик мавжуд эмас.
