Россияда мигрантлар фарзандлари учун рус тилини бепул ўқитиш таклиф қилинди
Ташаббус муаллифларига кўра, бу болаларнинг интеграциясига ёрдам беради ва рус тилининг хориждаги мавқеини сақлашга хизмат қилади.
Россиянинг Свердловск вилояти Инсон ҳуқуқлари бўйича вакили Татяна Мерзлякова мигрантлар фарзандлари учун рус тилини бепул ўқитиш ташаббуси билан чиқди. Унинг таъкидлашича, ҳозирги вақтда бундай курслар асосан ота-оналар маблағи ҳисобидан ташкил этилмоқда. Бу ҳақда Коммерсант нашри хабар берди.
Мерзлякованинг фикрича, мазкур ташаббус нафақат мигрант оилаларни қўллаб-қувватлаш, балки рус тилининг халқаро мавқеини сақлаб қолиш ва кенгайтириш учун ҳам муҳим аҳамиятга эга.
“Мен болаларга рус тилини бепул ўқитиш тарафдориман”, — деди у маҳаллий телеканаллардан бирига берган интервьюсида.
Омбудсман Россиянинг ўзи айрим ҳолларда рус тилининг хорижда кенг тарқалиш имкониятларини чеклаб қўяётганини қайд этган. Унга кўра, бугунги шароитда тилнинг мавқеини заифлаштириш эмас, аксинча, мустаҳкамлаш муҳим вазифа ҳисобланади.
Шунингдек, у собиқ Совет мамлакатларида ҳам ёшлар орасида инглиз тилида таълим олишга қизиқиш ортиб бораётганини таъкидлаган. Мерзляковага кўра, бу ҳолат рус тилининг таъсир доирасига ҳам ўз таъсирини кўрсатмоқда.
Мазкур ташаббус Россия жамоатчилигида турли мунозараларга сабаб бўлди. Уни қўллаб-қувватловчилар бу мигрант болаларнинг жамиятга интеграциясини енгиллаштиришини айтмоқда. Танқидчилар эса бепул таълим дастури давлат буджетига қўшимча юк бўлишини таъкидламоқда.
