Россия ҳибсхонасидаги ўзбекистонликлар жазони Ўзбекистонда ўташ истагини билдирди
Ўзбекистон Бош консулхонаси Сахалин вилоятидаги муассасада сақланаётган Ўзбекистон фуқаролари билан мулоқот қилиниб, уларга нисбатан босим, қийноқ ёки мажбурий меҳнат қўлланилмаётганини, шунингдек ҳарбий можароларга жалб этиш ҳолатлари мавжуд эмаслигини текширди.
Ўзбекистоннинг Владивосток шаҳридаги Бош консулхонаси дипломатлари хизмат сафари доирасида Россиянинг Сахалин вилоятига ташриф буюрди. Бу ҳақда Дунё ахборот агентлиги хабар берди.
Ташриф давомида дипломатлар Сахалинда жойлашган 1-сонли жазони ижро этиш муассасасида сақланаётган 11 нафар Ўзбекистон фуқаролари билан учрашув ўтказган. Мазкур фуқаролар Россия Жиноят кодексининг тегишли моддалари бўйича айбдор деб топилиб, жазо муддатини ўтамоқда.
Учрашув чоғида консуллик вакиллари маҳкумлар учун яратилган шароитлар билан танишган. Жумладан, турар жой бинолари, умумий овқатланиш жойлари ҳамда маданий дам олиш хоналари кўздан кечирилган. Шунингдек, ватандошлар билан очиқ мулоқот ташкил этилган.
Суҳбат давомида маҳкумларнинг ҳолати, жазо ўташ жараёнида мажбурий меҳнат, босим ёки қийноқ ҳолатлари мавжудлиги масалалари ўрганилган. Шу билан бирга, уларнинг Россия Мудофаа вазирлиги ёки бошқа ҳарбий тузилмалар томонидан қуролли тўқнашувларда иштирок этишга жалб этилиши эҳтимоли юзасидан ҳам саволлар берилган. Маҳкумлар бундай ҳолатлар кузатилмаганини маълум қилган.
Шунингдек, айрим вакиллар томонидан жазо муддатини ўташ жараёнида ҳарбий тузилмаларга жалб этиш бўйича тушунтиришлар берилиши, ҳамда Украина ҳудудидаги “махсус ҳарбий операция”да иштирок этган шахсларга турли имтиёзлар таклиф этилиши ҳақида маълумотлар билдирилган.
Шу муносабат билан Бош консулхона вакиллари Ўзбекистон фуқароларини чет давлатлар ҳарбий тузилмалари ёки қуролли можароларда иштирок этиш мамлакат қонунчилигига зид экани ҳақида огоҳлантирган. Уларга Ўзбекистон Жиноят кодексининг 154-моддаси («Ёлланиш»)га мувофиқ бундай ҳаракатлар жиноий жавобгарликка сабаб бўлиши мумкинлиги тушунтирилди.
Маҳкумлар ўз навбатида муассаса шароитларидан қониқиш билдирган, бироқ яқинларини соғингани сабабли жазо муддатининг қолган қисмини Ўзбекистонда ўташ истагини билдирган.
Бироқ Ўзбекистон ва Россия ўртасида маҳкумларни жазони ўташ учун ўзаро топшириш бўйича амалдаги икки томонлама шартнома мавжуд эмаслиги сабабли, бундай имконият ҳозирча йўқлиги маълум қилинган.
Учрашув якунида фуқароларга Бош консулхона манзили ва алоқа маълумотлари тақдим этилган ҳамда зарурат туғилганда мурожаат қилишлари мумкинлиги билдирилган.
