Centrum Air ортиқча чипта сотиш амалиётидан фойдаланмаслигини маълум қилди
Авиакомпания Рақобат қўмитасининг сўровига расмий муносабат билдириб, Тошкент–Урганч рейсидаги вазият форс-мажор ҳолати сабаб юз берганини билдирди.
Рақобат қўмитаси “Centrum Air” ҳамда “Қанот Шарқ” хусусий авиакомпаниялар фаолиятида ортиқча билетлар сотилиши ва истеъмолчилар ҳуқуқларини таъминлаш ҳолати юзасидан Фуқаро авиацияси агентлигига сўров юборган эди.
Centrum Air 19 май куни Тошкент–Урганч йўналишидаги C6089 рейсида юзага келган ҳолат юзасидан расмий муносабат билдирди. Авиакомпания маълумотига кўра, рейс учун мўлжалланган Airbus A330 самолётини чақмоқ ургани сабаб у техник кўрикка олинган ва самолётни мажбурий равишда алмаштиришга тўғри келган.
Компания парвозларни жадвал асосида амалга ошириш мақсадида рейсга кичикроқ сиғимдаги Airbus А320 самолётини ажратганини маълум қилди. Натижада 42 нафар йўловчи ушбу рейс билан парвоз қила олмаган.
Авиакомпания қайд этишича, хавфсизлик нуқтаи назаридан самолётни алмаштириш ташиш шартномаси ҳамда амалдаги йўловчи ва багаж ташиш қоидаларида белгиланган. Йўловчиларга чипта пулини тўлиқ қайтариш ёки бошқа яқин рейсларга, жумладан бошқа авиакомпаниялар қатновларига бепул қайта бронь қилиш таклиф этилган.
Шунингдек, кутиш муддати узоқ давом этган йўловчилар меҳмонхонага жойлаштирилган. Ноқулайликлар учун эса ички рейсларга 50 фоизлик чегирма промокоди, кейинги парвоз учун бепул багаж жойи ҳамда самолётда қулайроқ ўриндиқни бепул танлаш имконияти тақдим этилгани айтилди.
Centrum Air C6089 рейсидаги ҳолат оverbuking, яъни самолётдаги ўриндиқлардан ортиқча чипта сотиш билан боғлиқ эмаслигини, вазият форс-мажор ҳолати сабаб юзага келганини таъкидлади.
Бундан ташқари, авиакомпания рейслар кечиккан ҳолатларда йўловчиларга олдиндан хабар берилиши, бепул таом ва ичимликлар тақдим этилиши, зарурат туғилганда эса меҳмонхона билан таъминланишини маълум қилди.
Компания барча мажбуриятлар амалдаги қонунчилик, жумладан истеъмолчилар ҳуқуқларини ҳимоя қилиш тўғрисидаги қонун ва ҳаво ташувлари қоидалари асосида бажарилаётганини билдириб, Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда Фуқаро авиацияси агентлиги билан ҳамкорлик қилишга тайёрлигини маълум қилди.
