Халқаро болаларни ҳимоя қилиш кунида учта янги ўзбек анимацион филми намойиш этилади
Томошабинларга замонавий талқиндаги “Зумрад ва Қиммат”, Алишер Навоий асари асосида яратилган “Саховат” ҳамда “Бурч изидан” фильмлари тақдим этилади. Намойиш бепул бўлади.
1 июнь – Халқаро болаларни ҳимоя қилиш куни муносабати билан Ўзбекистон кинематография агентлиги, Ўзбекистон анимацион студиялар ассоциацияси ҳамда “АSTIR” анимацион студияси ҳамкорлигида янги анимацион фильмлар премьераси бўлиб ўтади.
Намойиш 1 июнь куни соат 16:00 да Алишер Навоий номидаги Ўзбекистон миллий кино санъати саройида ташкил этилади. Томошабинларга “Зумрад ва Қиммат”, “Саховат” ҳамда “Бурч изидан” анимацион фильмлари тақдим этилади.
“Зумрад ва Қиммат” филми халқ эртаги қаҳрамонларининг замонавий талқинига бағишланган. Ҳар бири 10 дақиқадан иборат икки қисмли фильмда қаҳрамонларнинг бугунги даврга мос қиёфаси, қизиқишлари ва ҳаёт тарзи акс эттирилган.
- Сценарий муаллифи: Меҳрихон Ҳакимова
- Режиссёр: Абдулатиф Ҳайдаров
- Постановкачи рассом: Зилола Ҳамидова
- Композитор: Алексей Изволский
“Саховат” анимацион филми эса Алишер Навоийнинг “Ҳайрат ул-аброр” асари асосида яратилган. Асарда саховат, инсонийлик ва эзгулик ғоялари тарихий воқеалар ҳамда саргузаштлар орқали ёритилади.
- Сценарий муаллифи: Рустам Иқбол
- Режиссёр: Абдулатиф Ҳайдаров
- Постановкачи рассом: Зилола Ҳамидова
- Композитор: Шуҳрат Зокиров
“Бурч изидан” анимацион филми ўрмон ҳаёти ва қуёнлар саргузаштлари орқали ота меҳр-муҳаббати, жасорат ва фидойилик мавзуларига бағишланган.
- Сценарий муаллифи: Абдулла Чимирзаев
- Режиссёр: Абдулатиф Ҳайдаров
- Постановкачи рассом:Фарид Ҳамроқулов
- Композитор: Алексей Изволский
Учала фильмга ҳам режиссёр сифатида Абдулатиф Ҳайдаров бошчилик қилган. Анимацион қаҳрамонларга Барно Қодирова, Ирода Аҳмедова, Асадулло Набиев, Наврўз Жумаев, Ихтиёр Отажонов, Асадулла Абдуллаев, Бахтиёр Юсупов ва Эркин Бозоров каби актёрлар овоз берган.
Ташкилотчилар маълум қилишича, анимацион фильмлар намойиши барча томошабинлар учун бепул бўлади.
