Ўзбекистонда болаларни ёзги оромгоҳларга олиб борадиган автобуслар техник кўрикдан ўтказилди

Йўл ҳаракати хавфсизлиги хизмати маълумотига кўра, 2026 йилда республика бўйича 179 та стационар оромгоҳ ҳамда 1242 та мактабдаги соғломлаштириш масканларида жами 314 минг 190 нафар боланинг дам олиши режалаштирилган.

 

Болаларнинг хавфсизлигини таъминлаш мақсадида оромгоҳларда 692 нафар йўл патруль хизмати ходими хизмат олиб боради. Шунингдек, болаларни ташиш учун жалб этилган 1121 та автобуснинг техник ҳолати текширилиб, мавсумга тайёрланган.

 

ЙҲХХ маълумотларига кўра, оромгоҳларга олиб борувчи 3411,6 километр узунликдаги автомобиль йўллари ҳам кўрикдан ўтказилган. Аниқланган камчиликларни бартараф этиш юзасидан масъул ташкилотларга тақдимномалар киритилган.

 

Тайёрлов ишлари доирасида йўлларга 1297 та янги йўл белгиси ўрнатилиб, яроқсиз ҳолга келган белгилар алмаштирилган. Бундан ташқари, 244 минг квадрат метрдан ортиқ пиёдалар ўтиш жойларига йўл чизиқлари чизилган, 134 минг квадрат метрдан зиёд йўл қисми таъмирланган.

 

Амалдаги тартибга кўра, болалар гуруҳларини оромгоҳларга ташиш йўл-патруль хизмати ходимлари кузатуви остида амалга оширилади.

 

Йўл ҳаракати хавфсизлиги хизмати ота-оналарни ёзги таътил даврида фарзандларини қаровсиз қолдирмасликка, уларнинг йўл ҳаракати қоидаларига риоя этишини назорат қилишга ҳамда транспорт воситаларини вояга етмаганларга бошқариш учун бермасликка чақирди. 

 

Шунингдек, болаларни иссиқ ҳавода автомобилда ёлғиз қолдирмаслик ва йўл ҳаракати хавфсизлиги қоидаларига амал қилиш зарурлиги эслатилди.