Абдуқодир Хусанов Осиёнинг энг қиммат футболчисига айланди
Унинг трансфер қиймати 15 миллион еврога ошиб, 50 миллион еврога етди.
Ўзбекистон миллий терма жамоаси ҳимоячиси Абдуқодир Хусановнинг трансфер қиймати 50 миллион еврога етди. Бу ҳақда Трансфермаркт портали томонидан Англия Премер-лигаси футболчилари бозор қийматлари янгиланганидан сўнг маълум қилинди.
Янгиланган маълумотларга кўра, “Манчестер Сити” клубида тўп сураётган 22 ёшли футболчининг трансфер баҳоси 15 миллион еврога ошган. Аввал унинг қиймати 35 миллион еврони ташкил этган.
Ушбу кўрсаткич натижасида Абдуқодир Хусанов Осиёнинг энг қиммат футболчисига айланди. У рейтингда япониялик футболчилар Каишу Сано ва Такефуса Кубони ортда қолдирган.
Шунингдек, у Англия Премер-лигасида тўп сураётган собиқ иттифоқ мамлакатлари футболчилари орасида ҳам энг юқори трансфер қийматига эга футболчи сифатида қайд этилган. Ушбу рўйхатда иккинчи ўринни украиналик Егор Ярмолюк эгаллаган.
