Фарғонада вояга етмаган қиз ўзини каналга ташлади
Жонига қасд қилиш мақсадида кўприкдан сувга ўзини ташлаган қиз қутқариб қолинди.
Фарғона вилоятининг Бувайда туманида экология инспекторлари вояга етмаган қизнинг ҳаётини сақлаб қолишди. Бу ҳақда вилоят Экология ва иқлим ўзгариши бош бошқармаси матбуот хизмати маълум қилди.
Қайд этилишича, туман Экология бўлими инспекторлари навбатдаги рейд тадбирини ўтказаётган вақтда ҳудуддан оқиб ўтувчи Аччиқкўл канали устидаги кўприкдан вояга етмаган қизнинг сувга сакраганини пайқаб қолган.
Тахминан 200 метр масофада бўлган инспекторлар зудлик билан воқеа жойига етиб бориб, тезкор ҳаракатлари натижасида қизни сувдан олиб чиқишга муваффақ бўлган. Шундай қилиб, унинг ҳаёти сақлаб қолинган.
Ҳодисадан сўнг қизга биринчи тиббий ёрдам кўрсатилиб, тегишли хизматлар ҳамда унинг яқинларига хабар берилган.
