Эндиликда йилига бир нечта автомобил импорт қилиш мумкин
Автомобилларни импорт қилишда мувофиқлик сертификатини йилига бир марта бериш нормаси амалдан чиқарилди.
Ўзбекистонда жисмоний ва юридик шахслар томонидан шахсий фойдаланиш учун автомобил олиб киришда амал қилиб келган чекловлардан бири бекор қилинди.
Президент фармонига мувофиқ, эндиликда транспорт воситаларини импорт қилишда бир календар йил давомида фақат битта автомобил учун мувофиқлик сертификати берилишини назарда тутувчи норма амалдан чиқарилди.
Мазкур ўзгартириш Вазирлар Маҳкамасининг 2017 йил 25 апрелдаги 237-сон қарори билан тасдиқланган “Муомалага чиқарилаётган ғилдиракли транспорт воситаларининг хавфсизлиги тўғрисидаги умумий техник регламент”га киритилди.
Шу тариқа, транспорт воситалари техник регламент талабларига мос бўлган тақдирда, уларни импорт қилиш ва мувофиқлик сертификатини расмийлаштиришда аввалги йиллик чеклов қўлланилмайди.
Фармон билан қурилиш соҳасида ҳам қатор енгилликлар жорий этилди. Хусусан, 2029 йил 1 июлга қадар Ўзбекистонда ишлаб чиқарилмайдиган қурилишда фойдаланиладиган махсус техникалар, лаборатория ҳамда инструментал назорат ускуналарини импорт қилиш божхона божидан озод этилди.
