Эбола эпидемиясига қарши кураш учун 518 миллион доллар ажратилади
Конгода бир куннинг ўзида 71 та янги ҳолат аниқланган бўлиб, расмийлар буни “жамият ичида фаол тарқалиш” белгиси деб баҳолаган.
Конго Демократик Республикасида Эбола вирусининг Бундибугё тури тарқалиши давом этар экан, мамлакатда тасдиқланган ҳолатлар сони 488 тага, вафот этганлар сони эса 86 нафарга етди. Бу ҳақда мамлакат соғлиқни сақлаш органларига таяниб, AP хабар берди.
Расмий маълумотларга кўра, пайшанба куни бир сутканинг ўзида 71 та янги ҳолат қайд этилган. Мутахассислар буни касалликнинг аҳоли орасида фаол тарқалаётганидан далолат берувчи хавотирли кўрсаткич сифатида баҳоламоқда.
Қўшни Угандада ҳам Эбола билан боғлиқ 19 та тасдиқланган ҳолат ва икки ўлим қайд этилган.
Жаҳон соғлиқни сақлаш ташкилоти бош директори Тедрос Адҳаном Гебреесуснинг таъкидлашича, эпидемия бир неча ҳафта давомида аниқланмасдан тарқалган. Минтақадаги шифохоналарда Эбола вирусининг айнан ушбу турини аниқлаш имкониятлари бўлмагани сабабли касаллик кенгроқ ёйилиб кетган.
Бундибугё туридаги Эбола учун ҳозирча тасдиқланган вакцина ёки махсус даволаш усули мавжуд эмас. Шунга қарамай, Конго ҳукумати эпидемия расман тасдиқланганидан буён камида беш нафар бемор соғайганини маълум қилган.
Вазиятнинг жиддийлашуви фонида Жаҳон соғлиқни сақлаш ташкилоти Эбола тарқалишини жиловлаш учун 518 миллион долларлик халқаро режа ишга туширилганини эълон қилди. Тедрос Гебреесусга кўра, касалликни назорат остига олиш сиёсий ирода, барқарор молиялаштириш ҳамда маҳаллий аҳоли ишончи ва ҳамкорлигига боғлиқ.
Мутахассислар эпидемияга қарши курашга Конго шарқидаги хавфсизлик билан боғлиқ вазият ҳам салбий таъсир кўрсатаётганини қайд этмоқда. Хусусан, ҳукумат кучлари билан М23 исёнчи гуруҳи ўртасидаги тўқнашувлар ва қуролли ҳужумлар ёрдам етказиш ҳамда тиббий хизматларни ташкил этишни мураккаблаштирмоқда.
