Тайван Хитой кемаларини сув ҳудудидан чиқариб юборди
Ҳодиса Пекин ва Тайпей ўртасидаги кескинлик кучайиб бораётган бир пайтда, томонларнинг ўзаро огоҳлантиришлари билан кечди.
Тайван соҳил қўриқлаш хизмати мамлакат жанубидаги чекланган сув ҳудудига кирган Хитойнинг тўртта давлат кемаси ҳудуддан чиқариб юборилганини маълум қилди, дея хабар бермоқда Reuters.
Маълум қилинишича, ҳодиса Тайван ва Хитой ўртасидаги денгиздаги кескинлик фонида юз берди.
Тайван расмийларига кўра, учта соҳил қўриқлаш кемаси ҳам бўлган тўртта Хитой кемаси якшанба куни оролнинг жанубий қисмидан жануби-ғарбда жойлашган чекланган сув ҳудудига кирган. Бунга жавобан Тайван еттита соҳил қўриқлаш кемасини юбориб, Хитой кемаларини ҳудудни тарк этишга чақирган. Натижада кун охирига бориб барча кемалар ҳудуддан чиқиб кетган.
Воқеа Япония ва Филиппиннинг денгиз чегараларини белгилаш бўйича расмий музокараларни бошлаш режалари ортидан юз берди. Пекин бу жараён Тайван атрофидаги сув ҳудудларига ҳам тааллуқли эканини билдириб, норозилик билдирган.
Хитой давлат ОАВлари аввалроқ Тайваннинг шарқий қисмидаги сув ҳудудларида “махсус денгиз ҳуқуқни муҳофаза қилиш операцияси” ўтказиш учун кемалар юборилганини хабар қилган эди.
Тайван соҳил қўриқлаш хизмати томонлар ўртасидаги радиоалоқа ёзувини ҳам эълон қилди. Унда хитойлик офицер кемалар жойлашган ҳудуд Хитой юрисдикциясига тегишли эканини таъкидлаган.
Тайван томони эса Пекиннинг ушбу сув ҳудудларида суверен ҳуқуқларга эга эмаслигини билдирган.
Сўнгги ҳафталарда Тайван Хитой соҳил қўриқлаш кемалари фаоллиги сезиларли даражада ошганини қайд этмоқда. Хусусан, Жанубий Хитой денгизидаги Тайван назоратидаги Пратас ороллари атрофида бир неча бор қарама-қарши вазиятлар кузатилган.
Хитой ҳарбийлари ҳам Тайван яқинида деярли ҳар куни фаолият олиб бормоқда. Пекин Тайванни ўз ҳудудининг бир қисми деб ҳисоблайди ва зарурат туғилганда куч ишлатиш имкониятидан воз кечмаганини бир неча бор таъкидлаган. Тайван ҳукумати эса бу даъволарни рад этиб келмоқда.
Тайван Миллий хавфсизлик кенгаши бош котиби Жозеф Ву ижтимоий тармоқларда Хитойнинг ҳаракатларини танқид қилиб, Пекинни минтақадаги босимни кучайтираётганликда айблади.
