Трамп ҳар бир катта ёшли америкаликка 5 минг доллардан беришни ваъда қилди
АҚШ президенти Дональд Трамп Республикачилар партияси ноябрь ойидаги оралиқ сайловлардан сўнг Конгресс устидан назоратни сақлаб қолса, ҳар бир вояга етган АҚШ фуқаросига 5 минг доллардан дивиденд тўлашни ваъда қилди.
Трамп бу ҳақда Техас штатининг Даллас шаҳрида бўлиб ўтган Республикачилар миллий анжуманидаги нутқида маълум қилди. Унинг таъкидлашича, мазкур тўловлар АҚШ иқтисодиётидаги муваффақиятлар натижасида шаклланадиган дивиденд сифатида берилади.
Президент бу тизимни муваффақиятли компанияларнинг ўз инвесторларига дивиденд тўлашига қиёслади. Шунингдек, маблағлар АҚШ ҳудудида сарфланиши кераклигини таъкидлади.
Ҳозирча ушбу тўловларни амалга ошириш механизми, маблағларни кимлар олиши ва бундай ташаббуснинг ҳуқуқий асослари ҳақида аниқ маълумот берилмаган.
2025 йилда АҚШнинг вояга етган аҳолиси тахминан 267 миллион кишини ташкил этган. Агар уларнинг барчасига 5 минг доллардан тўланса, харажат қарийб 1,34 триллион долларни ташкил этади. Бироқ мамлакатдаги барча вояга етганлар АҚШ фуқароси эмас.
Трамп, шунингдек, оралиқ сайловларда президент партияси одатда Конгрессдаги ўринларни йўқотишини эслатиб, республикачилар бу тенденцияни ўзгартириши кераклигини айтди. У сайловчиларни партиясини қўллаб-қувватлашга чақирди.
Президент Республикачилар партияси сайловларда мағлуб бўлган тақдирда АҚШнинг чегаралар, солиқ имтиёзлари ва хавфсизлик борасидаги сиёсати хавф остида қолишини таъкидлади.
