Чирчиқда юк машинасининг тиркамаси хонадонга урилди
Хонадонга етказилган зарар қопланиши билдирилди.
Чирчиқда “Hоwо” юк машинасига уланган ярим тиркама ажралиб чиқиб, йўл четидаги хонадонга урилди. Ҳодиса оқибатида ҳеч ким жабрланмади. Бу ҳақда Тошкент вилояти ИИББ хабар берди.
Маълум қилинишича, воқеа 10 сентябрь куни соат 16:00 атрофида шаҳарнинг Садриддин Айний кўчасида юз берган.
1977 йилда туғилган ҳайдовчи юк машинани бошқариб кетаётганида унга уланган ярим тиркама техник сабабга кўра ажралиб чиққан. Тиркама йўл четидаги хонадонга бориб урилган ва шу ерда тўхтаган.
Ҳодиса туфайли йўлда транспорт ҳаракати вақтинча чекланган. Машиналар айланма йўллар орқали ҳаракатланган. Кейинчалик йўл ҳаракати тўлиқ тикланган.
Қайд этилишича, хонадонга етказилган зарар қонунчиликда белгиланган тартибда қопланади.
Ҳодиса юзасидан Чирчиқ шаҳар ИИБ суриштирув олиб бормоқда.
