Apple iPhone 18 Pro ва 18 Pro Мах'ни тақдим этди

Apple 9 сентябрь куни iPhone 18 Pro ва iPhone 18 Pro Max смартфонларини тақдим этди. Янги қурилмалар 2 нанометрли технология асосида ишлаб чиқилган A20 Pro чипи, 48 мегапикселли ўзгарувчан диафрагмали асосий камера ва кичрайтирилган Dynamic Island билан жиҳозланган.

 

iPhone 18 Pro ва Pro Max тўқ қора, кумушранг, мовий ва бургунди рангларда ишлаб чиқарилади. Қурилмаларнинг орқа қопқоғи ҳам корпус рангига мослаштирилган.

 

Янги смартфонларнинг асосий янгиликларидан бири — A20 Pro чипи. У 2 нанометрли технология асосида ишлаб чиқилган бўлиб, 6 ядроли марказий процессорга эга. Чипдаги график процессор 7 ядродан иборат ва Apple маълумотларига кўра, график унумдорлик 40 фоизга ошган. Шунингдек, қурилмага иккинчи нейрон двигатель қўшилган ва NPU ядролари сони 32 тага етказилган.

 

Apple iPhone 18 Pro'ни совитиш учун янги авлод буғ камераси (vapor chamber) тизимидан фойдаланган. Унинг юзаси iPhone 17 Pro'даги тизимга қараганда уч баравар катта.

 

Батарея ишлаш муддати ҳам узайтирилган. iPhone 18 Pro'да видео томоша қилиш 36 соатгача, iPhone 18 Pro Мах'да эса 45 соатгача давом этади. Компания маълумотига кўра, iPhone 18 Pro'ни сим орқали 15 дақиқа қувватлаш 6 соатлик видео томоша қилиш учун етарли қувват беради.

 

iPhone 18 Pro 48 мегапикселли ўзгарувчан диафрагмали асосий камерага эга. Диафрагма механизми олтита жуда юпқа қатламдан ташкил топган. Қоронғи шароитда диафрагма кенгайиб, камерага кўпроқ ёруғлик тушишини таъминлайди. Apple бунинг натижасида тунги суратлар тезроқ ва сифатлироқ олиниши мумкинлигини билдирган.

 

Янги моделларда Dolby Vision HDR форматида 4K сифатли таймлапс видеоларни суратга олиш имконияти ҳам мавжуд.

 

Apple шунингдек, камера учун Pro Controls функциясини жорий этди. У фойдаланувчига сурат ва видеоларни олиш жараёнида экспозиция ва shutter speed каби параметрларни қўлда бошқариш имконини беради. Фотографик услубларда текстура ва донадорликни созлаш имконияти ҳам қўшилган.

 

iPhone 18 Pro ва Pro Мах'да Dynamic Island кесмаси кичрайтирилган. У энди бир вақтнинг ўзида учта Live Аctivitiy'ни кўрсатиши мумкин.

 

Янги смартфонлар Apple Intelligence ва Siri AI билан ишлашга мослаштирилган. Тақдимотда Siri'нинг янада ифодали овозлар билан ишлаши ҳам намойиш этилган.

 

iPhone 18 Pro'нинг 256 GB хотирали версияси 1 199 доллар, iPhone 18 Pro Мах'нинг 256 GB версияси эса 1 299 доллардан бошланади. Бу iPhone 17 Pro'нинг бошланғич нархига нисбатан 100 долларга қимматроқ.

 

Янги моделларга 12 сентябрдан олдиндан буюртма бериш мумкин. Қурилмалар 18 сентябрдан сотувга чиқарилади.

 

Тақдимот Аpple'нинг янги бош директори Жон Тернус раҳбарлигидаги илк йирик тадбир бўлди. У 1 сентябрь куни Тим Кукнинг ўрнини эгаллаган, Кук эса компания директорлар кенгашининг ижрочи раиси лавозимига ўтган.