Суриянинг Идлиб вилоятида қурол омбори портлади: 14 киши ҳалок бўлди
Расмийлар ҳодисага нима сабаб бўлганини ҳозирча маълум қилмади.
Суриянинг Идлиб вилоятидаги Сармада шаҳри яқинида қурол-яроғ ва урушдан қолган ўқ-дорилар сақланадиган вақтинчалик омборда портлаш юз берди. Ҳодиса оқибатида камида 14 киши ҳалок бўлган, 11 киши жароҳатланган.
Портлаш 9 сентябрь куни Идлиб вилоятининг шимолидаги Бурж ан-Нимра қишлоғида содир бўлган. Портлашдан кейин омборда ёнғин келиб чиққан ва ҳудудни бир неча соат давомида қуюқ тутун қоплаган.
Фавқулодда хизматлар воқеа жойига етиб келган, бироқ иккиламчи портлашлар ёнғинни ўчириш ишларига халақит берган. Қутқарувчилар вайроналар остида қолган одамларни изламоқда.
Сурия Мудофаа вазирлиги маълумотига кўра, жароҳатланганлар орасида ҳарбий хизматчилар ҳам бор. Портлаган омбор 2011–2024 йилларда давом этган Сурия қўзғолони ва фуқаролар урушидан қолган қурол-яроғ ҳамда ўқ-дориларни сақлаш учун ишлатилган.
Ҳозирча расмийлар портлашга нима сабаб бўлганини маълум қилмаган.
Аввалроқ, 1 сентябрь куни Идлиб вилоятининг Бинниш шаҳрида ўқ-дорилар ортилган автомобиль портлаши оқибатида беш киши ҳалок бўлган ва яна бир неча киши жароҳатланган эди.
