Ўзбекистонда иш кунлари соат 23:00 дан 07:00 гача баланд шовқин чиқариш тақиқланади
Дам олиш ва ишланмайдиган байрам кунлари чеклов 22:00 дан 09:00 гача амал қилади.
Ўзбекистонда “Аҳолини шовқиннинг зарарли таъсиридан ҳимоя қилиш тўғрисида”ги қонун қабул қилинди. Унга кўра, фуқароларнинг осойишталиги ва нормал дам олишини бузадиган даражада шовқин чиқаришга айрим вақтларда йўл қўйилмайди.
Қонун билан шовқиннинг йўл қўйиладиган даражаси тушунчаси ҳам белгиланди. Бу санитария қоидалари ва нормаларида белгиланган, одамни сезиларли даражада безовта қилмайдиган ҳамда инсон организмида жиддий ўзгаришларга олиб келмайдиган шовқин даражаси ҳисобланади.
Қонунга кўра, йўл қўйиладиган даражадан юқори бўлган ва фуқароларнинг осойишталиги ҳамда нормал дам олишига халақит берадиган шовқинларга турар жойлардаги маиший фаолият, қурилиш ишлари, қурилиш техникаси ва транспорт воситалари, шунингдек, турли транспортларнинг ҳаракати натижасида юзага келадиган шовқинлар киради.
Бундай шовқинлар чиқаришга:
- иш кунлари 23:00 дан 07:00 гача;
- дам олиш ва ишланмайдиган байрам кунлари 22:00 дан 09:00 гача йўл қўйилмайди.
Шовқиннинг зарарли таъсири оқибатида етказилган зарар учун суд орқали компенсация ундириш мумкин.
Қонун расмий эълон қилинган кундан уч ой ўтгач кучга киради.
