Қирғизистонда ҳукумат раҳбарлари бир вақтда чет элда бўлиши тақиқланди
Шунингдек, хорижий давлат раҳбарининг Қирғизистонга давлат ташрифи ваколат муддати давомида фақат бир марта амалга оширилади.
Қирғизистон президенти Садир Жапаров томонидан “Қирғизистон Республикасининг Давлат протоколи тўғрисида”ги янги қонун имзоланди. Мазкур ҳужжат мамлакатнинг дипломатик маросимлари ва юқори даражадаги ташрифларни ташкил этиш тартибини тубдан янгилайди. Бу ҳақда 24.kg нашри хабар берди.
Маълум қилинишича, қонун Жогорку Кенеш томонидан 2026 йил 22 апрелда қабул қилинган бўлиб, 2012 йилдан буён амалда бўлган аввалги ҳужжат ўрнини эгаллайди.
Янги қонунга кўра, миллий хавфсизлик ва давлат бошқарувининг узлуксизлигини таъминлаш мақсадида президент, парламент раиси ва Вазирлар Маҳкамаси раисининг бир вақтнинг ўзида мамлакат ташқарисида бўлиши тақиқланади. Шунингдек, ушбу мансабдор шахсларнинг қисқа вақт оралиғида кетма-кет хорижий сафарларни амалга ошириши ҳам чекланади. Мазкур қоида халқаро ва кўп томонлама тадбирларга татбиқ этилмайди.
Ҳужжат билан хорижий давлат раҳбарларининг ташрифлари илк бор беш тоифага — давлат, расмий, ишчи, хусусий ва транзит ташрифларга ажратилган. Ҳар бир ташриф тури учун алоҳида протокол талаблари, кутиб олиш маросимлари ва ташкилий тартиблар белгиланган.
Қонунда давлат ташрифи хорижий давлат раҳбарининг Қирғизистонга амалга оширадиган энг юқори даражадаги ташрифи сифатида эътироф этилган. Бундай ташриф бир давлат раҳбари учун ваколат муддати давомида фақат бир марта ташкил этилиши мумкин. Ташриф давомида фахрий қоровул, миллий анъаналарни акс эттирувчи маросимлар, давлат қабуллари ва бошқа расмий тадбирлар ўтказилади. Қонунда шунингдек, давлат ташрифлари пайтида ҳурматли меҳмонларга захира транспорт воситаси бўлган VIP автомобил, турмуш ўртоғи учун алоҳида автомобил ва делегация, қўриқлаш, юк ва кузатув учун транспорт воситалари тақдим этилиши белгиланган. Жами бўлиб, автокортежда ўндан ортиқ транспорт воситаси бўлиши мумкин.
Бундан ташқари, давлат идоралари раҳбарлари томонидан хорижий делегациялардан олинган барча совғалар давлат мулки сифатида қайд этилиши, музейларга топширилиши ёки оммавий намойиш қилиниши белгиланган. Алоҳида қимматга эга совғалар эса сақлаш учун миллий захираларга топширилади.
Қонунга мувофиқ, Қирғизистонда фаолият бошлаётган хорижий элчилар президентга ишонч ёрлиқларини топширганидан кейингина ўз ваколатларини расман бошлаган ҳисобланади.
