Фарғонадаги қотиллик: бувисини ўлдирган йигит 17 йилга қамалди

Фарғона вилояти Бағдод туманида бувисининг уйига пул ва қимматбаҳо буюмларни ўғирлаш учун кирган йигит ва шериги қамалди.

 

Маълум бўлишича, марҳума кўп қаватли уйда ёлғиз яшаган. У фоиз эвазига пул берган ва уйида катта миқдорда маблағ борлигидан набираси хабардор бўлган. Аввал ўғрилик учун икки марта судланган йигит бу пулларни ўғирлашни режалаштирган.

 

У жиноятдан икки кун олдин Тошкентда ишлаётган тенгдошини Бағдодга чақирган. Шериги келгач, улар марҳуманинг уйига бориб, вазиятни кузатган. Бироқ атрофда одамлар кўплиги сабаб режани ўша куни амалга оширмаган.

 

Эртаси куни улар яна хонадонга борган. Бу сафар уйда ҳеч ким бўлмаган. Йигитлар ичкарига кириб, пул ва қимматбаҳо буюмларни қидира бошлаган. Шу пайт марҳума уйига қайтиб келган ва уларга қаршилик кўрсатган.

 

Набираси ёнида олиб келган ошхона пичоғи билан бувисининг кўкрак қисмига зарба берган. Аёл оғир жароҳат олиб, ҳушидан кетган. Йигитлар эса хонадондан тилла занжир, зирак, автомобиль монитори ва 2 миллион сўм пулни олиб чиқиб кетган.

 

Шундан сўнг йигит жиноят изларини яширишга уринган. У ёқилғи қуйиш шохобчасидан 10 литр бензин сотиб олиб, уй яқинига яширган. Кечаси эса хонадонга қайтиб, бензинни уйнинг турли жойлари ва бувисининг жасадига сепиб, ўт қўйган. Кейин эшикни қулфлаб, воқеа жойидан кетган.

 

Жиноят ишлари бўйича Бувайда туман судида кўриб чиқилган иш якунида йигит Жиноят кодексининг 97-моддаси 2-қисми “п” банди, 169-моддаси 2-қисми “г” банди ва 173-моддаси 2-қисми “б” бандида кўрсатилган жиноятларни содир этганликда айбли деб топилган. Унга 17 йил озодликдан маҳрум қилиш жазоси тайинланган.

 

Унинг шериги эса Жиноят кодексининг 97-моддаси 2-қисми “п” банди ва 169-моддаси 2-қисми “г” бандида кўрсатилган жиноятларни содир этганликда айбли деб топилиб, 16 йилга озодликдан маҳрум қилинган.