Президент топшириғи билан подполковник Дилноза Реджабовага полковник унвони берилди
У ИИВ Жамоат хавфсизлиги департаменти Йўл ҳаракати хавфсизлиги хизмати Ахборот хизматида етакчи мутахассис лавозимида фаолият юритади.
Ички ишлар вазирлиги тизимида қарийб 20 йилдан буён хизмат қилиб келаётган подполковник Дилноза Реджабовага “полковник” махсус унвони берилди. Бу ҳақда ИИВ хабар берди.
Дилноза Реджабова Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати Ахборот хизматида етакчи мутахассис лавозимида фаолият юритади. У хизмат фаолияти давомида йўл ҳаракати хавфсизлигини тарғиб қилиш, аҳолига йўл ҳаракати қоидаларини тушунарли етказиш ҳамда болалар ўртасида хавфсизлик маданиятини шакллантиришга эътибор қаратиб келган.
Унинг ташаббуси билан ўқувчи ёшлардан иборат йўл ҳаракати хавфсизлиги тарғиботчилари гуруҳи шакллантирилган. Мазкур гуруҳ 2024 йилда Қирғизистонда, 2025 йилда Тожикистонда ўтказилган халқаро танловларда II ўринни эгаллаган. 2026 йил август ойида Қозоғистонда ташкил этилган “Ёш йўл ҳаракати инспекторлари” халқаро мусобақасида эса I ўринни қўлга киритган.
Шунингдек, Тошкент шаҳри Олмазор туманидаги 441-сонли мактабгача таълим ташкилотида болаларга йўл ҳаракати қоидаларини амалий ва кўргазмали тарзда ўргатишга қаратилган машғулотлар йўлга қўйилган.
Дилноза Реджабованинг кўп йиллик самарали хизмати ва эришган натижалари инобатга олиниб, Ўзбекистон Республикаси Президентининг топшириғига биноан, Ички ишлар вазирининг буйруғи билан у рағбатлантирилди ва “полковник” махсус унвони берилди.
Мазкур унвон Ички ишлар вазири бошчилигида ўтказилган тадбирда унга тантанали равишда топширилди.
