Саудия Арабистонига ҳужум: муҳим нефть қувури ёпилди
Ушбу қувур Ҳормуз бўғозидаги нефть экспорти билан боғлиқ узилишлар шароитида муҳим муқобил йўналиш ҳисобланади.
Саудия Арабистони ҳудудидаги муҳим Шарқ-Ғарб нефть қувурига дронлар ҳужуми уюштирилгач, қувур вақтинча ёпилди. Ҳужум Ироқ ҳудудидан амалга оширилгани айтилмоқда.
1200 километр узунликдаги қувур мамлакат шарқидаги Абқайқ нефть конини Қизил денгиз бўйидаги Янбу порти билан боғлайди. Саудия Арабистони Энергетика вазирлиги қувурни эҳтиёт чораси сифатида ёпганини маълум қилди.
Саудия Ташқи ишлар вазирлиги ҳужум оқибатида жароҳатланганлар борлигини ва зарар етганини билдирди. Ҳозирча ҳужум учун ҳеч бир гуруҳ жавобгарликни ўз зиммасига олмаган.
Ироқ ҳукумати ҳужумни қоралаб, ўз ҳудудидан бошқа давлатларга қарши ҳужумлар уюштириш учун фойдаланилишига йўл қўймаслигини билдирди. Ироқ бош вазири Майсан вилоятидаги хавфсизлик операциялари қўмондонлиги фаолиятини текширишни буюрган, қўмондонни лавозимидан озод қилган. Шунингдек, Ироқ Эрон билан чегарадаги Шаламчеҳ чегара ўтиш пунктини вақтинча ёпган.
Ар- Риёд Ироқ бош вазирининг илтимосига кўра, «ҳозирча» жавоб қайтармаслигини билдирган, бироқ ўз манфаатларини ҳимоя қилиш учун барча зарур чораларни кўриш ҳуқуқини сақлаб қолган.
Шарқ-Ғарб қувури Саудия Арабистони учун стратегик аҳамиятга эга. У сўнгги ойларда кунига 4–5 миллион баррель нефть ташиган бўлиб, бу жаҳон нефть таъминотининг қарийб 4–5 фоизига тенг.
Қувур айниқса Ҳормуз бўғозидаги нефть экспорти билан боғлиқ узилишлар шароитида муҳим муқобил йўналиш ҳисобланади. Унинг ёпилиши глобал энергетика бозорига қўшимча босим қилиши ва нефть нархларининг ошишига олиб келиши мумкин.
Таҳлилчиларга кўра, Саудия Арабистонининг қувур ёпилиши сабаб юзага келган нефть экспортидаги йўқотишларни тезда қоплай оладиган муқобил имкониятлари чекланган. Мамлакат нефтнинг бир қисмини Миср орқали, Сувайш канали ёки SUMED қувури орқали экспорт қилишга уриниши мумкин.
