Истанбулдаги даҳшатли жиноят: қотиллар умрбодга қамалди
Улар марҳумаларнинг ўлимидан фойдаланиб, турар жойда ўғрилик қилганликда ҳам айбдор деб топилди.
Истанбулда Д. Ҳакимова ва С. Эргашалиевани ўлдириб, жасадларини бўлакларга ажратган икки Ўзбекистон фуқаросига суд ҳукми ўқилди.
Анадолу 17-оғир жиноятлар суди Д. Турдимуротов ва Ғ. Камолхўжаевнинг ҳар бирига икки мартадан оғирлаштирилган умрбод қамоқ жазоси тайинлади. Шунингдек, улар марҳумаларнинг ўлимидан фойдаланиб, турар жойда ўғрилик қилганликда айбдор деб топилиб, бу жиноят учун ҳам икки мартадан 7 йил қамоқ жазосига ҳукм қилинди.
Тергов маълумотларига кўра, 2026 йил 23 январь куни С. Эргашалиева Истанбулнинг Умрание туманидаги уйда пичоқ билан ўлдирилган. Кейинчалик Д. Ҳакимова ҳам шу уйда ўлдирилган.
Хавфсизлик камераларидаги ёзувларда судланувчиларнинг уйдан бир неча бор қора чиқинди пакетлари ва оқ жамадон билан чиққани қайд этилган. Тергов давомида жасад бўлаклари Истанбулнинг турли туманларидаги чиқинди контейнерларига ташлангани аниқланган.
Судда Ғ. Камолхўжаев С. Эргашалиевани ёлғиз ўзи ўлдирганини, Д. Ҳакимовани эса ўлдирмаганини айтди. Д. Турдимуротов эса фақат Д. Ҳакимовани «номус масаласи» сабабли ўлдирганини тан олиб, қилган ишидан пушаймон эканини билдирди.
Прокурор ҳар икки судланувчига икки мартадан оғирлаштирилган умрбод қамоқ ҳамда ўғрилик жинояти учун икки мартадан 7 йил қамоқ жазоси тайинлашни сўраган.
Суд ҳайъати прокурорнинг талабини қаноатлантириб, ҳар икки судланувчига икки мартадан оғирлаштирилган умрбод қамоқ ва икки мартадан 7 йил қамоқ жазоси тайинлади.
