“Қарор қабул қилишимиз керак”: Зеленский Путинга Маямида учрашишни таклиф қилди
Украина Президенти учрашувда айтиладиган гаплардан кўра, музокараларнинг натижаси муҳимлигини билдирди.
Украина Президенти Володимир Зеленский декабрь ойида АҚШнинг Маями шаҳрида бўлиб ўтадиган G20 саммити доирасида Россия Президенти Владимир Путин билан учрашишга тайёрлигини маълум қилди.
Зеленский бу ҳақда Deutsche Welle нашрига берган интервьюсида айтди. Унинг таъкидлашича, муҳим қарорларни қабул қилиш учун томонлар шахсан учрашиб, музокара олиб бориши зарур.
“Биз у ерда бўлишимиз керак. Биз учрашишимиз, гаплашишимиз ва қарор қабул қилишимиз керак”, — деди Зеленский.
У учрашув вақтида Путинга нима дейишидан кўра, музокаралар қандай натижа билан якунланиши муҳимроқ эканини таъкидлади.
“Гап сўзларда эмас. Мен унга нима дейишим ёки у менга нима демоқчи экани муҳим эмас. Муҳими — натижа. Ҳаммаси шу”, — деди Украина Президенти.
