Конгода Эбола қурбонлари сони 100 нафардан ошди
Вирусни юқтирганлар сони 550 кишини ташкил этмоқда.
Конго Демократик Республикасида Эбола вируси тарқалиши давом этмоқда. Мамлакат Соғлиқни сақлаш вазирлиги маълумотларига кўра, лаборатория томонидан тасдиқланган ўлим ҳолатлари сони 101 нафарга етган деб хабар бермоқда ТАСС мамлакат Соғлиқни сақлаш вазирлигига таяниб.
Қайд этилишича, жорий эпидемия даврида вирусни юқтирганлар сони 550 кишини ташкил этмоқда. Бир кун аввал ушбу кўрсаткичлар мос равишда 91 нафар вафот этган ва 515 нафар касалланган беморни ташкил қилган эди.
Мамлакатда эпидемиологик вазият мураккаблашиб бораётгани сабабли халқаро ҳамкорлар томонидан ёрдам кўрсатиш ишлари кучайтирилмоқда. Хусусан, Конго Демократик Республикаси Алоқа ва оммавий ахборот воситалари вазири Патрик Муяия Катембвенинг маълум қилишича, Хитойдан келган тиббиёт мутахассислари гуруҳи пойтахт Киншасага етиб келган.
Уларнинг асосий вазифаси маҳаллий тиббиёт ходимларига кўмаклашиш, беморларни даволаш ва Эбола вирусининг янада кенг тарқалишининг олдини олиш бўйича олиб борилаётган чораларни қўллаб-қувватлашдан иборат. Мутахассислар миссияси уч ой давом этиши режалаштирилган.
Маълумотларга кўра, Эбола эпидемияси ўтган ой Конго Демократик Республикаси ва Угандада қайд этилган. Соғлиқни сақлаш соҳасидаги экспертлар ушбу эпидемия сўнгги ўн йилликлардаги энг йирик ва энг ҳалокатли авж олиш ҳолатларидан бирига айланиши мумкинлигидан огоҳлантирмоқда.
