Ўзбекистонда болаларга транспорт воситасини бошқаришга берганларга жавобгарлик кучайтирилади
Вояга етмаган шахсларнинг транспорт воситасини бошқариши оқибатида йўлларда ўлим ва оғир жароҳатлар билан боғлиқ ҳодисалар кузатилаётгани қайд этилди.
Президент Шавкат Мирзиёев аҳоли саломатлиги ва миллат генофондини гиёҳвандликдан ҳимоя қилиш, шунингдек, йўл ҳаракати иштирокчилари хавфсизлигини таъминлашга қаратилган қонунчиликни такомиллаштириш масалалари юзасидан тақдимот билан танишди.
Тақдимот давомида гиёҳвандлик ва наркожиноятларга қарши курашиш тизимини замон талабларига мос равишда такомиллаштириш, ёшлар орасида ушбу иллатнинг тарқалишининг олдини олиш ҳамда бу борадаги профилактик чораларни кучайтириш масалалари муҳокама қилинди.
Шунингдек, йўл-транспорт ҳодисаларининг олдини олиш масалаларига алоҳида эътибор қаратилди. Қайд этилишича, айрим фуқаролар томонидан вояга етмаган шахсларга транспорт воситасини бошқаришга рухсат берилаётгани оқибатида йўлларда ўлим ва оғир тан жароҳатлари билан боғлиқ ҳолатлар юз бермоқда.
Шу муносабат билан йўл ҳаракати қоидаларига риоя этилишини таъминлашнинг янги механизмларини жорий этиш, оғир оқибатларга олиб келувчи аварияларнинг олдини олиш ҳамда бу борадаги жавобгарлик чораларини кучайтириш зарурлиги таъкидланди.
Давлат раҳбари гиёҳвандлик ва наркожиноятларга қарши курашишни замонавий ёндашувлар асосида ташкил этиш, ёшларни ушбу иллатдан ҳимоя қилиш, шунингдек, йўлларда инсон ҳаёти ва хавфсизлигини таъминлашга қаратилган таклифларни маъқуллади ҳамда муҳокама қилинган масалалар юзасидан масъул идораларга тегишли топшириқлар берди.
