Хитойнинг Буюк Хитой деворида Ўзбекистон терма жамоасини қўллаб-қувватлаш тадбири ўтказилди
Тадбирда нафақат ватандошлар, балки Қирғизистон, Қозоғистон ҳамда бошқа мамлакатлар вакиллари ҳам қатнашиб, Ўзбекистон футболчиларига омад тилади.
Жаҳон чемпионатида илк бор иштирок этаётган Ўзбекистон миллий терма жамоасини қўллаб-қувватлаш мақсадида Хитой пойтахти Пекин шаҳрида, дунёнинг энг машҳур тарихий обидаларидан бири — Буюк Хитой деворида махсус тадбир ташкил этилди.
Тадбир Ўзбекистоннинг Хитой Халқ Республикасидаги элчихонаси ташаббуси билан ўтказилган.Ташкилотчилар мазкур маскан бежиз танланмаганини, Буюк Хитой девори қатъият, матонат ва ғалабага бўлган букилмас ироданинг рамзи эканини таъкидлаган.
Акция давомида иштирокчилар миллий либосларда ва Ўзбекистон давлат байроқлари билан Буюк Хитой деворига кўтарилиб, миллий терма жамоага омад тилашган. Тадбирда нафақат ватандошлар, балки Қирғизистон, Қозоғистон ҳамда бошқа мамлакатлар вакиллари ҳам қатнашиб, Ўзбекистон футболчиларига ўз тилакларини билдирган.
Тадбир иштирокчилари Ўзбекистоннинг футбол бўйича Жаҳон чемпионатига чиққани нафақат мамлакат, балки бутун Марказий Осиё учун тарихий воқеа эканини қайд этиб, терма жамоага мусобақада муваффақият тилашган.
Эслатиб ўтамиз, Ўзбекистон миллий терма жамоаси 2026 йилги Жаҳон чемпионатидаги илк учрашувини 18 июн куни ўтказади.
