ЖЧ–2026: Бельгия–Миср баҳсида автогол Мисрни ғалабадан маҳрум қилди
G гуруҳидаги Бельгия–Миср учрашуви 1:1 ҳисобида якунланди.
2026 йилги футбол бўйича Жаҳон чемпионатининг G гуруҳи 1-туридан ўрин олган Бельгия ва Миср терма жамоалари ўртасидаги учрашув дуранг натижа билан якунланди.
АҚШнинг Сиэтл шаҳридаги “Lumen Field” стадионида бўлиб ўтган баҳсда жамоалар 1:1 ҳисобида дуранг натижа қайд этди. Учрашувни бразилиялик ҳакам Рамон Абатти бошқариб борган.
Ҳисоб 20-дақиқада мисрлик футболчи Имам Ашур томонидан очилган. Миср терма жамоаси узоқ вақт давомида устунликни сақлаб турган бўлса-да, 66-дақиқада ҳимоячи Муҳаммад Ҳаний томонидан киритилган автогол бельгияликларга муҳим очко келтирган.
Шу тариқа, ҳар икки жамоа гуруҳ босқичини бир очкодан бошлаган. G гуруҳидаги яна бир учрашувда Эрон ва Янги Зеландия терма жамоалари ўзаро баҳс олиб боради.
Иккинчи турда Бельгия Эрон билан, Миср эса Янги Зеландия билан куч синашади. Гуруҳ босқичининг сўнгги турида эса Миср Эрон билан, Бельгия эса Янги Зеландия билан майдонга тушади.
2026 йилги Жаҳон чемпионати АҚШ, Канада ва Мексикада ўтказилмоқда. Мусобақа 11 июнда старт олиб, 19 июль куни якунига етади.
