ЖЧ–2026даги илк сенсация: Испания Кабо-Вердени енга олмади
Испания томонидан 27 та зарба берилганига қарамай, ўйин 0:0 ҳисобидаги кутилмаган дуранг билан якунланди.
2026 йилги футбол бўйича Жаҳон чемпионатида илк йирик сенсациялардан бири қайд этилди. Мусобақа фаворитларидан бири саналган Испания терма жамоаси гуруҳ босқичидаги дастлабки учрашувда Кабо-Вердега қарши баҳсда ғалаба қозона олмади.
Учрашув 0:0 ҳисобидаги дуранг билан якунланди. Баҳс давомида испанлар майдонда тўлиқ устунликка эга бўлиб, рақиб дарвозаси томон 27 марта зарба йўллаган. Шунга қарамай, Кабо-Верде дарвозабони Возинья ишончли ўйин намойиш этиб, ўз жамоасини мағлубиятдан қутқариб қолган.
Статистик маълумотларга кўра, Испания тўпга эгалик қилиш бўйича 74 фоизлик устунликка эришган, кутилаётган голлар (xG) кўрсаткичи эса 2,29 ни ташкил этган. Кабо-Верде эса атиги 6 та зарба йўллаб, 0,30 xG қайд этган.
Испания сафида Педри, Ферран Торрес, Микель Оярсабаль ва Дани Ольмо бир неча бор хавфли вазиятлар яратган бўлса-да, гол уришнинг уддасидан чиқа олмаган. Иккинчи бўлимда майдонга тушган Ламин Ямал ва Нико Уильямс ҳам ҳисобни ўзгартира олмаган.
Қайд этилишича, Кабо-Верде футболчилари учрашув давомида атиги битта қоидабузарлик содир этган. Бу эса 1966 йилдан буён Жаҳон чемпионатлари тарихидаги энг яхши кўрсаткич сифатида қайд этилган.
Дурангга қарамай, Испания терма жамоасининг мағлубиятсиз серияси 32 та ўйинга етди. Бироқ жамоа Жаҳон чемпионатини кутилмаган очко йўқотиш билан бошлади.
