АҚШ Эрон билан музокараларда бир ҳафталик танаффус қилди — Трамп
Вашингтон Эрон билан музокараларни марҳум Олий раҳбарнинг дафн маросими сабаб вақтинча кечиктирди.
АҚШ президенти Доналд Трамп Вашингтон Эрон билан олиб борилаётган музокараларда марҳум Олий раҳбар Али Хоманаий дафн маросими муносабати билан бир ҳафталик танаффус қилганини маълум қилди.
Трамп бу ҳақда Жанубий Дакота штатидаги Рушмор тоғи яқинида АҚШ Мустақиллик куни муносабати билан ўтказилган тадбирда сўзлаган нутқида гапирган
“Улар келишувни жуда хоҳлаяпти. Биз уларга дафн маросими учун бир ҳафта вақт бердик”, — деган АҚШ президенти.
Шу билан бирга, Трамп музокаралар расман тўхтатилганини ёки танаффус эълон қилинганини бевосита тасдиқламаган. Унинг баёноти АҚШ ва Эрон ўртасида давом этаётган музокаралар фонида янграган.
Аввалроқ, The Wall Street Journal нашри манбаларига таяниб, Трамп Теҳрон билан музокаралар ўзаро англашув меморандумида белгиланган 60 кунлик муддатдан ошиб кетишини муаммо сифатида кўрмаётганини хабар қилган эди.
Эроннинг марҳум Олий раҳбари Али Хоманаий билан видолашув маросимлари 3 июль куни Теҳронда бошланган. Дафн маросимининг асосий тадбирлари 4–9 июль кунлари Эроннинг бир неча шаҳарида ўтказилиши, якуний маросим эса Машҳад шаҳрида бўлиб ўтиши режалаштирилган.
