Эрлинг Холанд дубли Бразилияни ЖЧдан чиқариб юборди
Норвегия тарихда илк бор Жаҳон чемпионати чорак финалига чиқди.
2026 йилги FIFА Жаҳон чемпионатининг 1/8 финал босқичида Норвегия терма жамоаси Бразилияни 2:1 ҳисобида мағлуб этиб, тарихда илк бор мундиал чорак финалига чиқди.
АҚШнинг Шарқий Рутерфорд шаҳридаги MetLife стадионида ўтказилган учрашувнинг бош ҳаками Исмоил Элфат бўлди.
Беллашувнинг 14-дақиқасида бразилиялик ярим ҳимоячи Бруно Гимараэс пенальтидан фойдалана олмади. Иккинчи бўлимда, 67-дақиқада Неймар майдонга тушди.
Учрашув тақдири сўнгги дақиқаларда ҳал бўлди. Норвегия ҳужумчиси Эрлинг Холанд 79-дақиқада ҳисобни очди, 90-дақиқада эса ўзининг иккинчи голини уриб, жамоасининг устунлигини мустаҳкамлади. Қўшимча дақиқаларда Неймар пенальтидан гол урган бўлсада, бу Бразилияни мағлубиятдан қутқара олмади.
Норвегия чорак финалда Мексика – Англия учрашуви ғолибига қарши майдонга тушади. Бразилия эса мусобақани 1/8 финал босқичида тарк этди.
Қайд этилишича, бу Норвегиянинг Жаҳон чемпионати тарихидаги илк чорак финалидир. Бразилия эса 1990 йилдан буён илк бор мундиални шунчалик эрта босқичда якунлади.
