Покистонда юк самолёти бедарак йўқолди

 
Покистон қутқарув хизматлари Араб денгизи устида радар алоқасини йўқотган K2 Airways авиакомпаниясига тегишли Boeing 737-400 юк самолётини қидиришни давом эттирмоқда. Самолёт бортида беш нафар экипаж аъзоси бўлган. Бу ҳақда Al Jazeera хабар берди.

 
Покистон аэропортлари маъмурияти маълумотига кўра, самолёт 7 июль куни БААнинг Шаржа шаҳридан Карачига парвоз қилаётган вақтида навигация тизимида носозлик юзага келгани ҳақида диспетчерларга хабар берган. Орадан бир неча дақиқа ўтиб, ҳаво кемаси билан алоқа узилган. Flightradar24 маълумотлари самолёт алоқа узилишидан аввал баландликни кескин ўзгартирганини, сўнг эса Араб денгизига томон жуда тез пасайганини кўрсатмоқда.

 
Покистон ҳарбий-денгиз кучлари, ҳарбий ҳаво кучлари ва бошқа давлат идоралари иштирокида кенг кўламли қидирув-қутқарув амалиёти олиб борилмоқда. Қидирув ишларига PNS Зулфиқар ҳарбий кемалари, разведка самолётлари ҳамда савдо кемалари жалб қилинган. Бироқ кучли муссон шамоллари ва денгиздаги ноқулай об-ҳаво қутқарув ишларини мураккаблаштирмоқда.

 
Расмийлар ҳозирча самолётнинг қулаганини расман тасдиқламаган. Шу билан бирга, қидирув ишлари асосан Карачидан тахминан 155 денгиз мили (қарийб 287 километр) жануби-ғарбдаги ҳудудда олиб борилмоқда.

 
К2 Airways авиакомпанияси ҳукумат идоралари билан ҳамкорлик қилаётганини билдириб, экипаж аъзоларининг омон қолишига умид қилаётганини маълум қилди. Reuters хабарига кўра, бедарак йўқолган Boeing 737-400 ушбу хусусий авиакомпаниянинг ягона самолёти бўлган.

 
Авиация мутахассислари самолётнинг қисқа вақт ичида кескин баландлик йўқотиши одатий двигатель носозлигига хос эмаслигини таъкидламоқда. Ҳодиса сабабларини аниқлаш бўйича тергов самолёт топилгандан кейингина бошланиши мумкин.

 

Бу воқеа Покистонда 2020 йилда Карачи шаҳрида юз берган ва 97 кишининг ҳаётига зомин бўлган Pakistan International Airlines самолёти ҳалокатидан бери мамлакатдаги илк йирик авиация ҳодисаси бўлиши мумкин.