Трамп Испания билан барча савдо алоқаларини тўхтатишни буюрди

АҚШ президенти Доналд Трамп НАТО саммити чоғида молия вазири Скотт Бессентга Испания билан барча савдо алоқаларини тўхтатиш бўйича топшириқ берганини маълум қилди. Унинг айтишича, бундай қарорга Мадриднинг НАТО мажбуриятларини бажармаётгани ва АҚШнинг Эронга қарши ҳарбий амалиётларини қўллаб-қувватламагани сабаб бўлган, демоқда Reuters ахборот агентлиги. 

 
Трамп Анқарада журналистлар билан суҳбатда Испанияни "НАТОдаги даҳшатли ҳамкор" деб атади.

 
"Мен молия вазирига Испания билан барча савдо алоқаларини тўхтатишни буюрдим. Биз улар билан ҳеч қандай савдо қилишни истамаймиз", деди АҚШ президенти.

 
АҚШ президенти, шунингдек, Испания альянснинг мудофаа харажатларини ялпи ички маҳсулотнинг 5 фоизигача ошириш бўйича янги мақсадини қўллаб-қувватламаётганини танқид қилди. Трампнинг фикрича, НАТОга аъзо барча давлатлар мудофаа учун тенг даражада маблағ ажратиши керак.

 
Вашингтон ва Мадрид ўртасидаги муносабатлар март ойидан буён кескинлашиб бормоқда. Ўшанда Испания ҳукумати АҚШнинг Эронга қарши ҳарбий операциялари учун Рота ва Морон қўшма ҳарбий базаларидан фойдаланишга рухсат бермаганди. Кейинчалик Мадрид АҚШ ҳарбий самолётлари учун ўз ҳаво ҳудудини ҳам ёпган эди.

 
Reuters маълумотига кўра, Пентагон аввалроқ Испанияга нисбатан қатор босим чораларини, жумладан, НАТОдаги мақомини қайта кўриб чиқиш эҳтимолини ҳам муҳокама қилган. Бироқ бу борада расмий қарор қабул қилинмаган.

 
Трампнинг янги баёноти АҚШ ва Эрон ўртасидаги кескинлик яна кучайган бир пайтда янгради. АҚШ 8 июль куни тонгда Эрон ҳудудидаги 80 дан ортиқ ҳарбий нишонга зарба берган, бунга жавобан Эрон Баҳрайн ва Кувайтдаги АҚШ ҳарбий объектларига ракета ҳамда дронлар билан ҳужум қилган эди. Шу фон сабаб НАТО ичидаги келишмовчиликлар янада яққол намоён бўлмоқда.

 
Ҳозирча Испания ҳукумати Трампнинг савдо алоқаларини тўхтатиш ҳақидаги сўнгги баёнотига расмий муносабат билдирмаган.