АҚШга қилинган ҳар бир ҳужумга Эронга 20 карра зарба берамиз — Трамп

 

АҚШ президенти Доналд Трамп Эрон томонидан амалга оширилиши мумкин бўлган ҳар қандай ҳужумга кескин жавоб қайтарилишини маълум қилди. Унинг айтишича, Қўшма Штатлар ҳар бир ҳужум эвазига Эронга 20 баравар зарба беришга тайёр.

 

Трамп бу ҳақда Туркияда ўтказилган НАТО саммитидан сўнг президент самолёти бортида журналистлар билан мулоқот чоғида баёнот берган.

 

“Биз уларга қаттиқ зарба бердик. Бу уларнинг кеча қилган ҳаракатларига жавоб эди. Улар учта кемага ҳужум қилишди. Агар улар бизга яна зарба берса, биз уларга 20 марта зарба берамиз”, — деди АҚШ президенти.

 

Шунингдек, у АҚШ ва Эрон ўртасидаги кенг кўламли ҳарбий можаро қайта бошланиши эҳтимоли ҳақида аниқ прогноз бера олмаслигини билдириб, бундай вазият юзага келган тақдирда АҚШ тезкор устунликка эришишига ишонч билдирди.

 

Трампнинг сўзларига кўра, Эрон вакиллари Вашингтон билан эҳтимолий келишув масаласида алоқага чиққан. Бироқ у Теҳроннинг бундай келишувга содиқ қолиш-қолмасига шубҳа билдирган.

 

Аввалроқ АҚШ Марказий қўмондонлиги Америка ҳарбийлари Эроннинг Ҳормуз бўғозидаги ҳарбий имкониятларини чеклаш мақсадида зарбаларни қайта бошлаганини маълум қилган эди. Шунингдек, Доналд Трамп 8 июль куни Эрон билан сулҳ амалда ўз кучини йўқотганини билдирган.