Тўрт ҳудудда кредит маблағларини талон-торож қилган банк ходимлари фош этилди
Текширувларда имтиёзли кредитларни ноқонуний расмийлаштириш, қалбаки ҳужжатлар орқали маблағларни ўзлаштириш ва фирибгарлик ҳолатлари аниқланди.
Қорақалпоғистон Республикаси, Фарғона, Андижон ва Бухоро вилоятларида кредит маблағларини ноқонуний ўзлаштириш билан боғлиқ бир қатор ҳолатлар фош этилди.
Бош прокуратура ҳузуридаги Иқтисодий жиноятларга қарши курашиш департаменти томонидан ўтказилган терговга қадар текширувларда банк тизими ходимлари ва бошқа шахсларнинг имтиёзли кредит маблағларини талон-торож қилгани аниқланган.
Хусусан, Қорақалпоғистон Республикасининг Беруний туманида тижорат банкининг уч нафар банк хизматлари маркази ходими ўзаро тил бириктириб, беш нафар фуқаро номига имтиёзли кредит расмийлаштириб, 146 миллион сўм маблағни ўзлаштиргани маълум бўлди.
Фарғона вилоятининг Риштон туманида эса тижорат банки филиалининг масъул ходимлари ва бошқа шахслар 21 нафар фуқаро номига "Ҳар бир оила – тадбиркор" дастури доирасида ҳунармандчилик, тикув ускуналари, иссиқхона ва чорвачиликни ривожлантириш учун жами 747 миллион сўм имтиёзли кредит ажратган. Бироқ фуқаролар бундан бехабар бўлган, маблағлар эса таъминотчи корхоналар ҳисобига ўтказилиб, ўзлаштирилган.
Андижон вилоятининг Хўжаобод туманида тижорат банки банк хизматлари маркази бошқарувчисининг собиқ ўринбосари ва бошқа шахслар фуқаро номига сохта тартибда якка тартибдаги тадбиркорлик субъекти ташкил этиб, қалбаки ҳужжатлар асосида 500 миллион сўм кредит маблағини ноқонуний ўзлаштиргани аниқланган.
Бухоро вилоятининг Жондор туманида тижорат банкининг собиқ раҳбари ва собиқ мутахассиси фуқаролар хабарисиз уларнинг номига 110 миллион сўм кредит расмийлаштириб, ушбу маблағларни фирибгарлик йўли билан қўлга киритгани маълум бўлди.
Шунингдек, Фарғона вилоятининг Қўштепа туманида тижорат банкининг собиқ бўлим бошлиғи фуқарога ипотека кредити ажратиб беришни ваъда қилиб, қалбаки кредит шартномаси орқали ажратилган маблағнинг 90 миллион сўмини ўз эҳтиёжлари учун ишлатиб юборгани аниқланган.
Мазкур ҳолатларнинг барчаси юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
