Ўзбекистонлик оилалар учун барча шароитларни яратамиз — Александр Лукашенко

 

Минск шаҳрида Шавкат Мирзиёев билан ўтказилган музокаралар якунида Беларус раҳбари мамлакатда ишчи кучига эҳтиёж мавжудлигини таъкидлаб, ўзбекистонлик оилаларни Беларусда истиқомат қилишга чaқирди.

 

Лукашенконинг сўзларига кўра, Беларусда ер ва сув ресурслари етарли бўлсада, айрим соҳаларда ишчи кучи танқислиги кузатилмоқда. Шу боис у ўзбекистонлик оилалар Беларусга келиб, яшаши, меҳнат қилиши, зарурат туғилганда тиббий хизмат ва таълим олиш имкониятидан фойдаланишини исташини билдирган.

 

Беларус президенти, шунингдек, икки давлат халқлари ўртасидаги дўстона муносабатларни алоҳида қайд этиб, мавжуд яқинликни амалий ҳамкорлик билан мустаҳкамлаш зарурлигини таъкидлаган.

 

Музокаралар давомида иқтисодий ҳамкорлик масалалари ҳам муҳокама қилинди. Хусусан, Беларус томони Ўзбекистонда қишлоқ хўжалиги техникаларини ишлаб чиқариш бўйича ҳамкорликни кенгайтириш, зарурат туғилганда ўзбекистонлик мутахассисларни Беларусдаги корхоналарда ўқитишга тайёрлигини маълум қилган.

 

Бундан ташқари, Беларус Ўзбекистон инвесторларини мамлакатнинг Витебск вилоятида чорвачилик лойиҳаларини амалга оширишга таклиф этган. Лукашенко бундай ҳамкорлик Ўзбекистонни сифатли гўшт ва сут маҳсулотлари билан таъминлаш, Беларус учун эса янги иш ўринлари яратиш ва қишлоқ ҳудудларини ривожлантиришга хизмат қилишини қайд этган.

 

Шунингдек, у Беларус ҳудудларида Ўзбекистон савдо уйлари тармоғини кенгайтириш ташаббусини илгари сурган.

 

Музокаралар якунида Ўзбекистон ва Беларус президентлари икки давлат ўртасида стратегик шериклик муносабатларини ўрнатиш тўғрисидаги декларацияни имзоладилар.