"Бизга ҳеч ким ҳеч нарсани текинга бермайди" — Месси
Аргентина сардори жамоа FIFA ёки ҳакамлар томонидан қўллаб-қувватланаётгани ҳақидаги иддаоларни рад этиб, жамоа барча натижаларга фақат меҳнат ва кураш орқали эришаётганини айтди.
Аргентина терма жамоаси сардори Лионел Месси Жаҳон чемпионатида жамоасига ён босилаётгани ҳақидаги танқидларга муносабат билдириб, Аргентина эришаётган муваффақиятлар ҳеч кимнинг ёрдами билан эмас, футболчиларнинг меҳнати эвазига қўлга киритилаётганини таъкидлаган.
Месси Англия устидан қозонилган 2:1 ҳисобидаги ғалабадан сўнг журналистлар билан суҳбатда жамоа яна бир бор ўз кучини исботлаганини айтган.
"Эришган ютуқларимиз ақл бовар қилмайди. Яна бир Жаҳон чемпионати финалига чиқдик. Бу кимларгадир ёқмаслиги мумкин, улар истаганини гапиришсин. Аммо бу жамоа ҳеч ким бизга ҳеч нарсани текинга бермаётганини яна бир бор исботлади", деган Месси.
Унинг сўзларига кўра, Аргентина терма жамоаси ҳар бир учрашувда ғалаба учун курашади ва натижаларни майдонда ҳал қилади.
"Биз курашамиз, рақобат қиламиз ва яхши футбол намойиш этамиз. Бугун ҳисобда ортда бўлсак ҳам, Англияга қарши ўйинни қандай назорат қилганимизни кўрдингиз. Мен бу жамоа билан фахрланаман ва барча аргентиналикларга қувонч улашаётганимиздан хурсандман", деган сардор.
Мессининг баёноти Жаҳон чемпионати давомида Аргентина фойдасига ҳакамлик қарорлари чиқарилаётгани ҳақидаги баҳслар ортидан янгради. Айниқса, Миср ва Швейцарияга қарши учрашувлардан кейин ижтимоий тармоқларда Аргентина «ВАРгентина» дея масхара қилина бошлаган, айрим мухлислар ва собиқ футболчилар FIFA жамоага ён босаётганини даъво қилган эди. Бироқ FIFA Ҳакамлар қўмитаси раҳбари Пиерлуижи Коллина бу айбловларни рад этиб, турнирдаги барча ҳакамлар мустақил ишлаётганини ва уларнинг ҳалоллигига шубҳа қилиш учун асос йўқлигини билдирган.
Месси Англияга қарши ярим финалда гол урмаган бўлсада, иккала голга ҳам ассистентлик қилди. Унинг узатмаларидан сўнг аввал Энсо Фернандес, сўнг эса қўшимча дақиқаларда Лаутаро Мартинес гол уриб, Аргентина 2:1 ҳисобида ғалаба қозонди. Натижада амалдаги жаҳон чемпиони кетма-кет иккинчи, умумий ҳисобда эса бешинчи йирик халқаро финалга йўл олди.
39 ёшли Месси ушбу мундиалда 8 та гол уриб, турнирнинг энг яхши тўпурарларидан бири бўлиб турибди. У, шунингдек, Жаҳон чемпионатлари тарихидаги энг сермаҳсул футболчига айланди ва олтинчи мундиалидаги фаолиятини яна бир финал билан безаш имкониятига эга бўлди.
