ЖЧ—2026: Аргентина Англияни 2:1 ҳисобида мағлуб этиб, финалга чиқди
19 июль куни Жаҳон чемпионати финалида Испания ва Аргентина чемпионлик учун баҳс олиб боради.
Аргентина терма жамоаси 2026 йилги ФИФА Жаҳон чемпионатининг иккинчи ярим финалида Англияни 2:1 ҳисобида мағлуб этиб, финал йўлланмасини қўлга киритди.
АҚШнинг Атланта шаҳридаги Mercedes-Benz Stadiumда бўлиб ўтган учрашувни америкалик ҳакам Исмоил Элфат бошқариб борди.
Ҳисоб ўйиннинг 55-дақиқасида Англия ҳужумчиси Энтони Гордон томонидан очилди. Аргентина 85-дақиқада Энсо Фернандеснинг голи эвазига мувозанатни тиклади. Асосий вақтга қўшиб берилган 2-дақиқада эса Лаутаро Мартинес рақиб дарвозасини ишғол қилиб, Аргентинага ғалаба келтирди.
Учрашувда Лионель Месси иккита голли узатмани амалга оширди. Шунингдек, у 39 ёш-u 21 кунлигида Жаҳон чемпионати ярим финалида майдонга тушган энг ёши катта майдон ўйинчиси сифатида тарихга кирди.
Мазкур натижа билан амалдаги жаҳон чемпиони Аргентина кетма-кет иккинчи бор Жаҳон чемпионати финалига йўл олди.
Финалда Лионель Скалони шогирдлари аввалроқ Францияни 2:0 ҳисобида мағлуб этган Испания терма жамоасига қарши майдонга тушади.
Финал учрашуви 19 июль куни бўлиб ўтади. Учинчи ўрин учун баҳсда эса Англия ва Франция терма жамоалари ўзаро тўқнаш келади.
