Абдуқодир Ҳусанов “Манчестер Сити” билан шартномасини 2031 йилгача узайтиради
Ҳусанов ўтган мавсум клуб сафида 37 та учрашув ўтказиб, жамоанинг асосий ҳимоячиларидан бирига айланди.
Ўзбекистонлик ҳимоячи Абдуқодир Хусанов ва бельгиялик ярим ҳимоячи Жереми Доку "Манчестер Сити" билан 2031 йилгача мўлжалланган янги шартномалар имзолаш арафасида.
Бу ҳақда The Athletic нашри журналисти Сем Ли маълум қилди.
Манбага кўра, ҳар икки футболчи билан амалдаги келишувлар узайтирилади. Хусановнинг амалдаги шартномаси 2029 йилгача, Докуники эса 2028 йил июнигача амал қилади.
22 ёшли Абдуқодир Хусанов 2025 йил январь ойида Франциянинг «Ланс» клубидан "Манчестер Сити" сафига қўшилган. У ўтган мавсумда барча мусобақаларда 37 та учрашув ўтказиб, жамоанинг асосий ҳимоячиларидан бирига айланган ҳамда клуб билан Англия Кубоги ва Лига кубогида ғолиб чиқди.
Жереми Доку эса 2025/26 йилги мавсумда 47 та ўйинда майдонга тушиб, 8 та гол ва 14 та голли узатма муаллифи бўлди.
Аввалроқ "Манчестер Сити" ярим ҳимоячи Фил Фоден билан ҳам янги шартнома имзолагани маълум қилинган эди. Клуб яқин кунларда ҳимоячи Ёшко Гвардиол билан ҳам янги келишувни расмийлаштириши кутилмоқда.
