Жанубий Африканинг айрим ҳудудларида кучли қор ёғди
Ғарбий Кейпдаги тоғ чўққилари ҳам қор билан қопланди. Мамлакат об-ҳаво хизмати айрим ҳудудларда жуда совуқ, ёмғирли ва кучли шамолли об-ҳаво кузатилиши ҳақида огоҳлантирди.
Жанубий Африканинг бир қатор провинцияларида кучли қор ёғиб, ҳаво кескин совиди. Мамлакат жанубига кириб келган совуқ ҳаво тўлқини бир нечта ҳудудларда қишки об-ҳавони юзага келтирди.
Шарқий Кейп, Квазулу-Натал ва Фри Стейт провинцияларининг баланд ҳудудларида қор ёққани қайд этилди. Ғарбий Кейпдаги тоғ чўққиларига ҳам қор тушган.
Жанубий Африка об-ҳаво хизмати мамлакатнинг айрим ҳудудларида ёмғирли, жуда совуқ ва шамолли об-ҳаво кузатилиши ҳақида огоҳлантирди. Жанубий Фри Стейт, Шимолий Кейп, Гаутенг ва Мпумаланга провинциялари ҳам совуқ ҳаво таъсирида қолган.
Шарқий Кейп ва Квазулу-Наталнинг ички ҳудудларида ҳам совуқ ва нам об-ҳаво кузатилмоқда. Тоғли ҳудудларда қор ёғиши давом этиши мумкин.
Кучли шамол ва ёмғирли об-ҳаво совуқни янада кучайтираётган бўлса, мамлакатнинг соҳилбўйи ҳудудларида денгиз тўлқинлари кучайгани қайд этилган.
Бу ҳолат мамлакатда одатда кузатиладиган нисбатан илиқ қиш шароитидан кескин фарқ қилмоқда.
