Шавкат Мирзиёев “Росатом” раҳбарини қабул қилди
Учрашувда Ўзбекистондаги илк интеграциялашган АЭС қурилиши, мутахассислар тайёрлаш ва атомчилар шаҳарчасини барпо этиш масалалари муҳокама қилинди.
Президент Шавкат Мирзиёев 23 октябрь куни «Росатом» давлат корпорацияси бош директори Алексей Лихачёвни қабул қилди.
Учрашувда мамлакатда илк интеграциялашган атом электр станциясини барпо этиш лойиҳасини амалга ошириш, шунингдек, илғор технологиялар ва билимлар асосида тегишли инфратузилмани ривожлантириш масалалари муҳокама қилинди.
Биринчи реактор биноси пойдеворини қуриш ва атом электр станциясини лойиҳалаштириш ишлари изчил давом этаётгани қайд этилди.
Суҳбат давомида соҳа учун малакали мутахассислар тайёрлашга ҳам алоҳида эътибор қаратилди. Бунда «ММФИ» Миллий тадқиқот ядро университетининг Тошкентдаги филиали ҳамда «Росатом» объектлари имкониятларидан фойдаланиш масалалари кўриб чиқилди.
Шунингдек, бўлажак АЭС яқинида энергия тежамкор уй-жойлар, замонавий таълим, тиббиёт ва спорт муассасалари ҳамда аҳолига қулай шароит яратадиган ижтимоий инфратузилмага эга атомчилар шаҳарчасини барпо этиш истиқболлари муҳокама қилинди.
