“Даволаш иши” ўрнига 6 йиллик “Умумий тиббиёт” дастури жорий этилади

Президент Шавкат Мирзиёев тиббиёт ва фармацевтика соҳасида кадрлар тайёрлаш, уларни давлат рўйхатидан ўтказиш ҳамда узлуксиз касбий таълим тизимини такомиллаштириш бўйича таклифлар тақдимоти билан танишди. 

 

Тақдимотда 2027/2028-ўқув йилидан тиббиёт олийгоҳларида “Даволаш иши” йўналиши ўрнига 6 йиллик “Умумий тиббиёт” бакалавриат дастурини жорий этиш таклиф қилинди. Беш йиллик таълимдан сўнг талабалар бир йил тўлиқ амалий тайёргарликдан ўтади.

 

Дастурни муваффақиятли тамомлаган битирувчилар оилавий шифокор сифатида ишлаш имкониятига эга бўлади. Оилавий тиббиёт бўйича кадрлар тайёрлашда резидентларнинг оилавий поликлиникаларда бир вақтнинг ўзида ўқиши ва амалиёт ўташи йўлга қўйилади.

 

Тор соҳа мутахассисларини тайёрлаш босқичма-босқич резидентурага ўтказилиб, магистратура асосан илмий-педагогик кадрлар тайёрлашга йўналтирилади.

 

Шунингдек, тиббиёт олийгоҳларига қабул параметрлари ҳудудлар ва тиббиёт муассасаларининг реал эҳтиёжи ҳамда кадрлар етишмовчилиги асосида шакллантирилиши таклиф қилинмоқда. Давлат буюртмаси йўналишлар кесимида Соғлиқни сақлаш вазирлиги томонидан тасдиқланади.

 

Тақдимотда ўрта тиббиёт кадрларини тайёрлаш, олий маълумотли ҳамшираларнинг ташхис, даволаш ва профилактика жараёнларидаги ролини ошириш ҳамда фармацевтика таълимини ишлаб чиқариш билан янада яқин боғлаш бўйича таклифлар ҳам кўриб чиқилди.