Шавкат Мирзиёев ёш парламент аъзоларига мурожаат йўллади

 

Президент Шавкат Мирзиёев Парламентлараро Иттифоқнинг ХII Ёш парламент аъзолари бутунжаҳон конференцияси иштирокчиларига мурожаат йўллади.

 

Давлат раҳбари ёш парламентарийларни нуфузли анжуман муносабати билан самимий қутлаб, “Минг йиллардан буён тамаддунлар, халқлар ва ғояларни бирлаштираётган кўприк – кўҳна ва навқирон Самарқанд шаҳрига хуш келибсиз!”, – дея таъкидлаган.

 

Президент мазкур конференциянинг Ўзбекистонда илк бор ўтказилаётганини Янги Ўзбекистонда амалга оширилаётган демократик ислоҳотларга халқаро ҳамжамият томонидан берилаётган юксак баҳонинг ифодаси сифатида қайд этди.

 

Анжуман дунёда глобал зиддиятлар, беқарорлик ва қуролли можаролар кучайиб бораётган мураккаб шароитда ўтказилаётгани таъкидланди. Шу нуқтайи назардан “Нотинч даврларда барча учун инсон ҳуқуқлари, адолат ва қадр-қимматни тиклаш” мавзуси долзарб экани қайд этилди.

 

Мурожаатда бугунги кунда 500 миллиондан зиёд болалар ва ёшлар қуролли можаролар ҳудудларида яшаётгани, кўплаб ёшларнинг таълим олиш имконидан маҳрум экани қайд этилди.

 

Шавкат Мирзиёев Ўзбекистонда ёш авлодни қўллаб-қувватлаш давлат сиёсатининг устувор йўналишларидан бири эканини таъкидлади. “Ўзбекистон – 2030” стратегиясида ёшларнинг билим ва салоҳиятини тўлиқ рўёбга чиқариш учун зарур шароитлар яратиш белгиланган.

 

Қайд этилишича, 39 миллионлик аҳолининг қарийб 56 фоизини ёшлар ташкил этади. Сўнгги йилларда ёшларнинг таълим олиши, илмий фаолият билан шуғулланиши ва тадбиркорлик билан банд бўлиши учун кенг имкониятлар яратилган.

 

Жумладан, дунёнинг энг яхши 100 талигига кирувчи олий таълим муассасаларида таҳсил олаётган ўзбекистонлик ёшлар сони 3,5 минг нафардан ошган, илмий даражага эга ёш олимлар улуши икки баравар кўпайган. Ёшларнинг тадбиркорлар сафидаги улуши эса 35 фоизга етган.

 

Олий Мажлис Қонунчилик палатаси ва Сенати ҳузуридаги Ёшлар парламентлари бўлажак халқ вакиллари учун тажриба мактабига айлангани таъкидланди. 2024 йилги сайловларда 200 га яқин ёшнинг вакиллик органлари аъзоси этиб сайлангани сиёсий ҳаётдаги янгиланишларнинг муҳим натижаси сифатида қайд этилди.

 

Президент Ўзбекистоннинг ёшлар сиёсати халқаро миқёсда ҳам эътироф этилаётганини таъкидлаб, мамлакат БМТнинг “Ёшлар – 2030” стратегиясини жадал амалга ошираётган етакчи давлатлар қаторидан жой олганини қайд этди.

 

Шунингдек, Парламентлараро Иттифоқ доирасида қабул қилинаётган Ёшлар ва келажак авлодлар тўғрисидаги Самарқанд резолюцияси олқишланди.

 

Шавкат Мирзиёев Ўзбекистон ёшлар салоҳиятини рўёбга чиқариш борасидаги илғор тажрибаси билан ўртоқлашиш учун махсус платформа тақдим этишга тайёрлигини билдирди.

 

Давлатимиз раҳбари барча иштирокчиларни келгуси йили Ўзбекистонда ўтказиладиган “Авлодлар мулоқоти” халқаро ёшлар конгрессида иштирок этишга таклиф этди.

 

Мурожаат якунида Президент Самарқанддаги мулоқот ва мунозаралар очиқ ва конструктив руҳда ўтишига, анжуман доирасида қабул қилинадиган ҳужжатлар глобал тинчлик ва ҳамкорликни мустаҳкамлашга хизмат қилишига ишонч билдирди.