Уч ҳудудда наркосавдогарлардан 12,7 кг гиёҳвандлик воситалари олинди
Ушланганлардан бири синтетик гиёҳвандлик воситасини қўшни давлатдан “Cobalt” автомобилининг ёқилғи бакига яшириб олиб ўтишга уринган.
Давлат хавфсизлик хизмати, Ички ишлар, Божхона ва Чегара қўшинлари ходимлари ҳамкорлигида Тошкент вилояти, Тошкент шаҳри ҳамда Наманган вилоятида ўтказилган тезкор тадбирларда йирик миқдордаги гиёҳвандлик воситалари аниқланди. Бу ҳақда ДХХ хабар берди.
Жумладан, Бўстонлиқ туманида ўтказилган тадбирда Андижон вилояти Марҳамат туманида яшовчи, 2000 йилда туғилган шахс бошқарувидаги “Cobalt” автомобили тўхтатилган. У тадбир иштирокчиларининг қонуний талабига бўйсунмасдан қочишга уринган ва автомобиль салонидаги шубҳали моддаларни улоқтириб юборган.
Транспорт воситаси ва тегишли геолокация кўздан кечирилиши натижасида жами 5 кг “гашиш” гиёҳвандлик воситаси процессуал тартибда расмийлаштириб олинган.
Чилонзор туманида ўтказилган тезкор тадбирда эса 2005 йилда туғилган хорижий давлат фуқароси ушланган. Унинг ёнида ва вақтинча яшаётган хонадонида турли озиқ-овқат маҳсулотлари номи остида қадоқланган пакетлар аниқланган.
Улардан 4 кг 133 гр “3-хлорметкатенон”, 403 гр “Амфетамин”, 720 гр “МДМА” ва 20 гр “кокаин” гиёҳвандлик воситалари борлиги аниқланган.
Наманган вилоятининг Учқўрғон туманидаги чегара-божхона постида ўтказилган тадбирда эса Чортоқ туманида яшовчи, 2000 йилда туғилган шахс бошқарувидаги “Lasetti” автомобили текширилган. Унинг ёқилғи баки ичидан 2 кг 513 гр “Альфа-ПВП” синтетик гиёҳвандлик воситаси топилган.
Шунингдек, мазкур шахс билан бирга чегарагача келган ва постни пиёда кесиб ўтиб, Ўзбекистон ҳудудида уни кутиб турган 2005 йилда туғилган чортоқлик шериги ҳам ушланган.
Ҳозирда учала ҳолат юзасидан жиноят ишлари қўзғатилиб, тергов ҳаракатлари олиб борилмоқда.
