Ўзбекистон Журналистлар уюшмаси 35 та “Маҳорат мактаби”ни ташкил этди
Машғулотлар интернет журналистикаси, босма матбуот, телевидение, радио, ҳуқуқий, спорт ва фотожурналистика йўналишларида ўтказилади.
Ўзбекистон Журналистлар уюшмаси мамлакат мустақиллигининг 35 йиллиги муносабати билан республика ҳудудларида 35 та таниқли журналистнинг “Маҳорат мактаби”ни ташкил этди.
Ташаббус Уюшма Уставида белгиланган устувор вазифаларни амалга ошириш мақсадида йўлга қўйилган. Унда ўзига хос ижод мактабини яратган журналистлар тажрибасини оммалаштириш, “Устоз-шогирд” анъаналарини қўллаб-қувватлаш ҳамда ёш журналистлар билан мунтазам ишлаш кўзда тутилган.
35 та “Маҳорат мактаби”нинг 20 таси Уюшманинг ҳудудий бўлимлари томонидан мувофиқлаштирилади. 15 таси эса Тошкент шаҳрида Уюшманинг марказий аппарати қошида фаолият юритади.
Тошкент шаҳридаги машғулотлар Ўзбекистон Миллий матбуот марказида, Контент марказида ва таҳририятларда ўтказилади. Бунинг учун зарур шарт-шароитлар яратилади. “Маҳорат мактаби”ни бошқарган ижодкорларни рағбатлантириш чоралари ҳам кўрилади.
Сабоқлар интернет журналистикаси, босма матбуот, телевидение, радио, ҳуқуқий журналистика, спорт журналистикаси ва фотожурналистика каби йўналишларда олиб борилади.
“Маҳорат мактаблари”га журналистика йўналишида таҳсил олаётган талабалар ҳамда соҳага қизиқувчи ёшлар жалб этилади. Машғулотлар якунида иштирокчиларга сертификат берилади.
Уюшма маълумотига кўра, мазкур ташаббус журналистларнинг янги авлодини тайёрлаш борасида бошланган тизимли фаолиятнинг узвий қисми ҳисобланади. Келгусида ушбу йўналишдаги амалий ишлар турли танловлар ва лойиҳалар орқали изчил давом эттирилади.
