2027 йилдан давлат хизматчиларига иш ҳақи тўлаш тартиби ўзгаради
Давлат хизматчиларининг лавозим маоши 11 та разряд асосида белгиланади.
Ўзбекистонда давлат фуқаролик хизматчиларининг меҳнатига ҳақ тўлаш тизими ўзгартирилади. Президентнинг 2026 йил 2 сентябрдаги ПФ-181-сон фармонига кўра, 2027 йил 1 январдан бошлаб давлат органлари ва ташкилотларида бошқарув ходимларига меҳнатига ҳақ тўлашнинг янги тизими жорий этилади.
Янги тартибга кўра, давлат фуқаролик хизматчиларининг асосий лавозим маоши ягона тамойил асосида меҳнатга ҳақ тўлаш тариф сеткаси ҳамда лавозимнинг иш ҳақи фондидаги улушига кўра белгиланади. Бошқарув ходимлари учун эса энг муҳим самарадорлик кўрсаткичларига эришилгани учун ҳар ойлик устамалар жорий қилинади.
KPI бўйича ходимнинг фаолияти A, B, C ва D рейтинглари асосида баҳоланади. 100 баллдан юқори натижа кўрсатган ходимга лавозим маошининг 25 фоизи, 85–100 балл олганга 20 фоизи, 70–85 балл олганга 15 фоизи миқдорида ҳар ойлик устама берилади. 70 баллдан паст натижа қайд этилганида эса KPI учун устама тўланмайди.
Шунингдек, бонус тўловлари учун ҳам маблағлар назарда тутилган. Бир йил давомида бонус тўлаш учун харажатлар сметасида бир ойлик лавозим маоши миқдорида маблағ режалаштирилади. Бонус тўловлари хизмат вазифаларини ташаббускорлик билан бажарган, алоҳида муҳим топшириқларни адо этган ёки мураккаб вазифаларни амалга оширишда юқори натижа кўрсатган ходимларга берилиши мумкин.
Фармонда давлат фуқаролик хизматчиларига дам олиш ва байрам кунлари, тунги вақтда ишлаганлик учун компенсация тўловларини амалга ошириш, шунингдек, ходимларни байрамлар ва ҳисобот даври якунида мукофотлаш имконияти ҳам белгиланган.
Янги тариф тизимида лавозимлар 11 та разряд бўйича гуруҳланган. Масалан, вазир лавозими 11-разряд, вазирнинг биринчи ўринбосари 10-разряд, вазир ўринбосари 9-разряд. Туман ва шаҳар ҳокими учун ҳам 11-разряд назарда тутилган.
Фармонга кўра, янги тизим давлат фуқаролик хизматчиларининг меҳнатига ҳақ тўлашни ягона ва шаффоф тамойиллар асосида ташкил этиш, ходимларнинг самарадорлигини ошириш ҳамда юқори натижа кўрсатган мутахассисларни моддий рағбатлантиришга қаратилган.
