Эрта никоҳни “яширган” амалдорлар жаримага тортиладими?
Янги қонун лойиҳаси муҳокамага қўйилди.
Бош прокуратура томонидан “Вояга етмаганларнинг никоҳи, ҳомиладорлиги ва туғилиши ҳақида хабар бермаслик учун жазо чоралари белгиланиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш тўғрисида”ги қонун лойиҳаси ишлаб чиқилиб, жамоатчилик муҳокамасига тақдим этилди.
Ҳужжатга кўра, Маъмурий жавобгарлик тўғрисидаги кодексга янги — 188-5-модда киритилиши таклиф қилинмоқда. Ушбу модда доирасида давлат органи ёки бошқа ташкилотнинг мансабдор шахси ёхуд ходими ўзига маълум бўлган ҳуқуқбузарлик — жумладан, вояга етмаганнинг никоҳга кириши, ҳомиладорлиги ёки туғилиши ҳақидаги маълумотни ички ишлар органларига ва Инсон ижтимоий хизматлар марказларига топширмаса, бу ҳолат ҳуқуқбузарлик сифатида баҳоланади.
Лойиҳада белгиланган жарима миқдорлари қуйидагича белгиланган.
Биринчи марта содир этилганда:
фуқаролар ва ходимлар учун — 3 дан 5 баравар базавий ҳисоблаш миқдоригача (1,32 миллион сўмдан 2,2 миллион сўмгача);
мансабдор шахслар учун — 5 дан 10 баравар базавий ҳисоблаш миқдоригача (2,2 миллион сўмдан 4,4 миллион сўмгача).
Худди шу қоидабузарлик маъмурий жазо қўлланилганидан кейин бир йил ичида такрор содир этилса:
фуқаролар ва ходимлар учун — 5 дан 10 баравагача (2,2 миллион сўмдан 4,4 миллион сўмгача);
мансабдор шахслар учун — 10 дан 15 баравагача (4,4 миллион сўмдан 6,6 миллион сўмгача).
Шунингдек, лойиҳада ушбу модда бўйича ишларни кўриб чиқишни жиноят ишлари бўйича судларнинг юрисдикциясига ўтказиш ҳам таклиф этилмоқда.
Ҳужжат ҳозирча жамоатчилик муҳокамасида бўлиб, якуний кўриниши муҳокама якунларига қараб ўзгариши мумкин.
