Тошкентда бир кунда 22 та ЙТҲ содир бўлди, 4 киши жароҳатланди

 

4 сентябрь куни Тошкент шаҳрида жами 22 та йўл-транспорт ҳодисаси қайд этилди. Улар оқибатида 4 нафар фуқаро оғир тан жароҳати олган.

 

Шунингдек, кун давомида пойтахт йўлларида 4 751 та йўл ҳаракати қоидабузарлиги аниқланган.

 

Тошкент шаҳар Йўл ҳаракатини ташкил этиш маркази маълумотларига кўра, 4 сентябрь куни сутка давомида пойтахт кўчаларида 1 502 057 та транспорт воситаси ҳаракатланган. Бу 3 сентябрь кунги кўрсаткичдан 14 807 тага, яъни 1 фоизга кўп.

 

Кун давомида жамоат транспорти 170 та йўналишда 1 670 та автобус орқали ташкил этилиб, 1 228 158 нафар йўловчи ташилган. Тошкент метрополитенидан эса иш куни давомида 862 053 нафар йўловчи фойдаланган.

 

Тиғиз вақтларда 6 та чорраҳада тирбандлик даражаси 7 баллга, яна 1 та чорраҳада 7 баллдан юқори кўрсаткичга етган.

 

Тирбандлик кузатилган ҳудудларда транспорт оқимини барқарорлаштириш мақсадида светофорларнинг иш режими мувофиқлаштирилиб, айрим йўналишларда яшил сигнал вақти узайтирилган. Шунингдек, ҳаракатни тартибга солиш учун тегишли чорраҳаларга ЙПХ ходимлари жалб этилган.

 

Пойтахт йўлларидаги транспорт оқими ва тирбандлик ҳолати реал вақт режимида мониторинг қилиниб, ҳаракат интенсивлигидан келиб чиқиб светофорларнинг иш режимига тезкор ўзгартиришлар киритиб борилмоқда.