Хитойда 7 магнитудали зилзила: камида 16 киши ҳалок бўлди
339 та оиланинг уйи вайрон бўлган, қутқарув ишлари давом этмоқда.
Хитойнинг Тибет автоном вилоятидаги Нагчу шаҳри яқинида 7 магнитудали зилзила содир бўлди. Бу ҳақда Sinxua ахборот агентлиги маҳаллий фавқулодда вазиятлар бошқармасига таяниб хабар берди.
Зилзила оқибатида камида 16 киши ҳалок бўлган, 32 киши жароҳатланган. Жабрланганларнинг 11 нафари оғир аҳволда экани маълум қилинган.
Дастлабки маълумотларга кўра, зилзилада 339 та оиланинг уйи вайрон бўлган. Қутқарувчилар ҳудудда қидирув-қутқарув ишларини давом эттирмоқда, жабрланганларга тиббий ёрдам кўрсатилмоқда. Айни пайтда етказилган зарар миқдори аниқланмоқда.
Хитой Фавқулодда вазиятлар вазирлиги маълумотига кўра, зилзила ўчоғи 10 километр чуқурликда жойлашган. Ҳодисадан сўнг мамлакатда фавқулодда вазиятларга жавоб бериш тизимининг тўртинчи даражаси фаоллаштирилиб, зарар кўрган ҳудудга махсус гуруҳ юборилган.
Эслатиб ўтамиз, 2025 йил январь ойида Тибетнинг Шигатсе шаҳри яқинидаги Тингри округида 6,8 магнитудали зилзила содир бўлган ва 120 киши ҳалок бўлганди.
