Фолбиндан мижозгача назоратда: махсус рўйхат шакллантирилмоқда

 

Тожикистон Ички ишлар вазирлиги фолбинлар, сеҳргарлар, фоҳишалар, уларнинг мижозлари ва оила аъзоларини доимий мониторинг қилиш мақсадида махсус маълумотлар базасини шакллантирмоқда. Бу ҳақда вазирлик матбуот хизмати хабар берди.

 

Рўйхатга гиёҳванд моддалар билан боғлиқ фаолиятга алоқадор шахслар ва бошқа тоифалар ҳам киритилмоқда. Вазирлик ушбу чораларни хурофот, фолбинлик ва жодугарликнинг олдини олиш зарурати билан изоҳлаган.

 

Баёнотда маълумотлар базасига киритилган шахслар доимий мониторинг остида бўлиши, улар ҳақидаги маълумотлар эса тегишли органларнинг сўровига биноан тақдим этилиши қайд этилган.

 

Шунингдек, вазирлик фуқароларни ўзлари махсус рўйхатга тушиб қолмаслик ва оиласи олдида обрўсига путур етказмаслик учун унда кўрсатилган тоифадаги шахслардан узоқроқ юришга чақирган.

 

2024 йил август ойида ҳам Тожикистон Ички ишлар вазирлиги фолбинлар ва сеҳргарларни рўйхатга олиш бошланганини маълум қилган эди. Ўшанда уларга мурожаат қилган фуқаролар полиция бўлимларига чақирилиши, фотосуратлари ва шахсий маълумотлари махсус базага киритилиши айтилган.

 

Шу йилнинг апрель ойида мамлакатда табиблар, фолбинлар, сеҳргарлар ва тумор ясовчилар ниқоби остида фирибгарлик ёки алдов содир этганлик учун жавобгарликни кучайтириш таклиф қилинган. Бундай ҳуқуқбузарликлар учун олти ойгача мажбурий меҳнат жазоси белгиланиши мумкинлиги хабар қилинган.

 

Тожикистонда жодугарлик ва фолбинлик учун 80–100 ҳисоблаш кўрсаткичи миқдорида жарима ёки 10–15 суткагача маъмурий қамоқ жазоси қўлланиши мумкин. Бир йил ичида такроран содир этилган ҳуқуқбузарлик учун эса бир йилдан икки йилгача озодликдан маҳрум қилиш жазоси назарда тутилгани хабар қилинган.

 

2026 йилнинг биринчи ярмида Душанбеда фолбинлик билан боғлиқ 93 та ҳолат аниқланган. Шулардан бешта такрорий ҳолат бўйича жиноий иш қўзғатилган, яна 11 нафар фуқаро фолбинлар хизматидан фойдалангани учун жаримага тортилган.