Саида Мирзиёеванинг саъй-ҳаракатлари туфайли Apple Pay ва Google Pay тизимлари Ўзбекистон тўлов тизимларига интеграция қилинди
Хизматлар кундалик ҳисоб-китобларни соддалаштириш, нақд пулга эҳтиёжни камайтириш ва хорижий сайёҳлар учун қулайлик яратишга хизмат қилади.
Ўзбекистонда халқаро рақамли тўлов хизматларини жорий этиш бўйича янги босқич бошланди. Мамлакатда Google Pay ва Apple Pay хизматлари ишга туширилди. Бу ҳақда Президент администрацияси раҳбари Саида Мирзиёева ўзининг Telegram-каналида маълум қилди.
Жараёнда Саида Мирзиёеванинг ташаббуслари ва музокаралари муҳим аҳамият касб этган.
Хусусан, Google компанияси вице-президенти Каран Бҳатия билан учрашувда халқаро тўлов тизимларидан фойдаланиш учун зарур ҳуқуқий ва технологик шароитларни яратиш масалалари муҳокама қилинган.
Мазкур хизматларнинг жорий этилиши фуқаролар ва хорижий меҳмонларга смартфон орқали контактсиз тўловларни амалга ошириш имкониятини кенгайтиради. Бу кундалик ҳисоб-китобларни соддалаштириш, нақд пулга эҳтиёжни камайтириш ва сайёҳлар учун қўшимча қулайликлар яратишга хизмат қилади.
Шунингдек, халқаро рақамли тўлов хизматларининг йўлга қўйилиши Ўзбекистоннинг тўлов инфратузилмасини халқаро стандартларга яқинлаштириш ҳамда глобал технологик ҳамкорликни кенгайтириш учун янги имкониятлар очади.
